mukh-phaT munh pe khaenge talwar ho so ho

mukh-phāT muñh pe khā.eñge talvār ho so ho

dabne ke bhī to us se nahīñ yaar ho so ho

jaanā mujhe bhī ab taraf-e-yār ho so ho

yā bole yā batā.e vo dhutkār ho so ho

sayyād ko to ḳhvāb-e-taġhāful se kaam hai

ahvāl-e-tā.irān-e-giraftār ho so ho

saudā.ī ban ke us pe mujhe haath Dālnā

hañgāma is meñ jo sar-e-bāzār ho so ho

jī par yahī Thanī hai to aaj us ko chheḌ kar

khānī mujhe bhī gāliyāñ do chaar ho so ho

go is meñ hāthā-pā.ī bhī ho jaave Dar nahīñ

lūñgā maiñ us kā bosa-e-ruḳhsār ho so ho

mujh ko bhī kāTnī qafas apne kī tīliyāñ

yā TuuTe yā bache mirī minqār ho so ho

shikva kabhī na yaar kā lāveñge muñh pe ham

ham par jafā-e-charḳh-e-sitam-gār ho so ho

apnī shifā ko apne ḳhudā par tū chhoḌ de

āḳhir to maut hai dil-e-bīmār ho so ho

maanī shabīh-e-yār pe mat aap ko miTā

lūñgā banā maiñ tujh se jo tayyār ho so ho

ai dil! tū sāda-rūyoñ kī bhapkī meñ aa na jā

ik din lipaT ke chhīn le talvār ho so ho

sar phoḌ kar ke jā.eñge us kī galī meñ ham

rañgeñge ḳhuun se dar-o-dīvār ho so ho

san.āñ kī tarah ik but-e-kāfir ke ishq meñ

kāfir ho bāñdhnā hameñ zunnār ho so ho

lenī matā-e-husn hameñ is meñ tājiro!

nuqsān-e-jān-o-māl-e-dil-e-zār ho so ho

shoḳhī hai terī tab.a meñ shiddat se 'mus.hafī'

le bhaag sar se shaiḳh ke dastār ho so ho

mukh-phaT munh pe khaenge talwar ho so ho

dabne ke bhi to us se nahin yar ho so ho

jaana mujhe bhi ab taraf-e-yar ho so ho

ya bole ya batae wo dhutkar ho so ho

sayyaad ko to KHwab-e-taghaful se kaam hai

ahwal-e-tairan-e-giraftar ho so ho

saudai ban ke us pe mujhe hath Dalna

hangama is mein jo sar-e-bazar ho so ho

ji par yahi Thani hai to aaj us ko chheD kar

khani mujhe bhi galiyan do chaar ho so ho

go is mein hatha-pai bhi ho jawe Dar nahin

lunga main us ka bosa-e-ruKHsar ho so ho

mujh ko bhi kaTni qafas apne ki tiliyan

ya TuTe ya bache meri minqar ho so ho

shikwa kabhi na yar ka lawenge munh pe hum

hum par jafa-e-charKH-e-sitam-gar ho so ho

apni shifa ko apne KHuda par tu chhoD de

aaKHir to maut hai dil-e-bimar ho so ho

mani shabih-e-yar pe mat aap ko miTa

lunga bana main tujh se jo tayyar ho so ho

ai dil! tu sada-ruyon ki bhapki mein aa na ja

ek din lipaT ke chhin le talwar ho so ho

sar phoD kar ke jaenge us ki gali mein hum

rangenge KHun se dar-o-diwar ho so ho

sanan ki tarah ek but-e-kafir ke ishq mein

kafir ho bandhna hamein zunnar ho so ho

leni mata-e-husn hamein is mein tajiro!

nuqsan-e-jaan-o-mal-e-dil-e-zar ho so ho

shoKHi hai teri taba mein shiddat se 'mushafi'

le bhag sar se shaiKH ke dastar ho so ho