mumkin hai ab faza-e-sahar bolne lage

mumkin hai ab fazā-e-sahar bolne lage

fitrat ḳhud apne rāz-e-nihāñ kholne lage

phūloñ ko log kāñToñ pe jab tolne lage

ghabrā ke saare ahl-e-chaman bolne lage

ham us ḳhulūs-e-kufr-o-yaqīñ ke haiñ muntazir

jab raushnī se raat bhī sach bolne lage

hairat-asar hai husn-e-samā’at kā mo'jiza

tasvīr mere kānoñ meñ ras gholne lage

kyoñ nāḳhudā ko qādir-e-tūfāñ samajh liyā

ye kyā karegā naav agar Dolne lage

duniyā hamāre harf-e-mudallal pe hai ḳhamosh

ham chup raheñ to saarā jahāñ bolne lage

tāroñ kī ḳhair tāroñ bhare āsmāñ kī ḳhair

ab ham inheñ bhī misl-e-guhar rolne lage

ḳhud-āgahī kī quvvat-e-parvāz dekh kar

asrār-e-kā.enāt bhī par tolne lage

is tajrabe ke vāste ik ‘umr chāhiye

alfāz saath chhoḌ deñ dil bolne lage

husn-e-kalām tishna-e-takmīl hai 'urūj'

jab tak na apne muñh se hunar bolne lage

mumkin hai ab faza-e-sahar bolne lage

fitrat KHud apne raaz-e-nihan kholne lage

phulon ko log kanTon pe jab tolne lage

ghabra ke sare ahl-e-chaman bolne lage

hum us KHulus-e-kufr-o-yaqin ke hain muntazir

jab raushni se raat bhi sach bolne lage

hairat-asar hai husn-e-sama’at ka mo'jiza

taswir mere kanon mein ras gholne lage

kyon naKHuda ko qadir-e-tufan samajh liya

ye kya karega naw agar Dolne lage

duniya hamare harf-e-mudallal pe hai KHamosh

hum chup rahen to sara jahan bolne lage

taron ki KHair taron bhare aasman ki KHair

ab hum inhen bhi misl-e-guhar rolne lage

KHud-agahi ki quwwat-e-parwaz dekh kar

asrar-e-kaenat bhi par tolne lage

is tajrabe ke waste ek ‘umr chahiye

alfaz sath chhoD den dil bolne lage

husn-e-kalam tishna-e-takmil hai 'uruj'

jab tak na apne munh se hunar bolne lage