munh khol ke dil ki baat kahi kab un se pareshan-haalon ne

muñh khol ke dil kī baat kahī kab un se pareshāñ-hāloñ ne

haañ aadhī aadhī raat ga.e jā jā ke satāyā nāloñ ne

ab sab kī zabāñ se sun liije ḳhalvat kā bayāñ jalvat kā bayāñ

uf kyā kyā raaz na faash kiye āġhosh-e-junūñ ke pāloñ ne

is dil ko rāh-e-mohabbat meñ jis jis ne paayā luuT liyā

ik tum hī nahīñ sab ne ye kiyā ḳhāroñ ne guloñ ne lāloñ ne

āñkhoñ pe laToñ kā jhuk aanā tāsīr-e-nazar kā baḌh jaanā

amrit ke kaToroñ meñ āḳhir kuchh zahr milāyā kāloñ ne

farhād gayā majnūñ na rahā ik 'rizvī' hai allāh rakhe

kuchh baat vafā kī rakh lī hai in chand pareshāñ-hāloñ ne

munh khol ke dil ki baat kahi kab un se pareshan-haalon ne

han aadhi aadhi raat gae ja ja ke sataya nalon ne

ab sab ki zaban se sun lije KHalwat ka bayan jalwat ka bayan

uf kya kya raaz na fash kiye aaghosh-e-junun ke palon ne

is dil ko rah-e-mohabbat mein jis jis ne paya luT liya

ek tum hi nahin sab ne ye kiya KHaron ne gulon ne lalon ne

aankhon pe laTon ka jhuk aana tasir-e-nazar ka baDh jaana

amrit ke kaToron mein aaKHir kuchh zahr milaya kalon ne

farhad gaya majnun na raha ek 'rizwi' hai allah rakhe

kuchh baat wafa ki rakh li hai in chand pareshan-haalon ne