munh pher kar wo sab se gaya bhi to kya gaya

muñh pher kar vo sab se gayā bhī to kyā gayā

kam-baḳht saare shahr ko pāgal banā gayā

patthar ko bolne kī adā.eñ sikhā gayā

vo shaḳhs kaise kaise tamāshe dikhā gayā

us ko yahāñ se jaane kā behad malāl thā

muḌ muḌ ke apne ghar kī taraf dekhtā gayā

duniyā-e-ḳhvāb aur haqīqat ke darmiyāñ

thoḌā jo fāsla thā use bhī miTā gayā

sab jānte hue bhī maiñ anjān hī rahā

is ne samajh liyā ki maiñ dhoke meñ aa gayā

ye kaun de rahā hai dar-e-dil pe dastakeñ

ye kaun mere ḳhvāb kī dīvār Dhā gayā

kuchh aur pūchhne kī zarūrat nahīñ rahī

halke se muskurā ke vo sab kuchh batā gayā

de to gayā azāb-e-judā.ī mujhe magar

girheñ jo dil meñ thiiñ vo unheñ kholtā gayā

koī bhī uzr-e-lañg kī sūrat nahīñ rahī

lo ab tumhāre sāmne ā.īna aa gayā

jis kā har ek naqsh kaf-e-pā hai aa.ina

is rāh-rau ko DhūñDne ḳhud rāsta gayā

munh pher kar wo sab se gaya bhi to kya gaya

kam-baKHt sare shahr ko pagal bana gaya

patthar ko bolne ki adaen sikha gaya

wo shaKHs kaise kaise tamashe dikha gaya

us ko yahan se jaane ka behad malal tha

muD muD ke apne ghar ki taraf dekhta gaya

duniya-e-KHwab aur haqiqat ke darmiyan

thoDa jo fasla tha use bhi miTa gaya

sab jaante hue bhi main anjaan hi raha

is ne samajh liya ki main dhoke mein aa gaya

ye kaun de raha hai dar-e-dil pe dastaken

ye kaun mere KHwab ki diwar Dha gaya

kuchh aur puchhne ki zarurat nahin rahi

halke se muskura ke wo sab kuchh bata gaya

de to gaya azab-e-judai mujhe magar

girhen jo dil mein thin wo unhen kholta gaya

koi bhi uzr-e-lang ki surat nahin rahi

lo ab tumhaare samne aaina aa gaya

jis ka har ek naqsh kaf-e-pa hai aaina

is rah-rau ko DhunDne KHud rasta gaya