munh-zor aarzuon ki be-mehriyan na puchh

muñh-zor ārzūoñ kī be-mehriyāñ na pūchh

begāna ho rahī haiñ ye lā kar kahāñ na pūchh

fehrist muhsinoñ kī nihāyat tavīl hai

mujh se mirī tabāhiyoñ kī dāstāñ na pūchh

mujh ko panāh dī na tire ġham ne bhī kabhī

maiñ de rahā huuñ kitne ġhamoñ ko amaañ na pūchh

har zaḳhm chand zaḳhmoñ kī kartā hai parvarish

kaise sadā-bahār hai ye gulsitāñ na pūchh

dasht-e-vafā kī vus.atoñ ko pā sakā hai kaun

gum kis qadar hue haiñ yahāñ kārvāñ na pūchh

vābasta moḌ moḌ se haiñ kitne hādsāt

ye qatl-gāh hai ki dayār-e-butāñ na pūchh

munh-zor aarzuon ki be-mehriyan na puchh

begana ho rahi hain ye la kar kahan na puchh

fehrist muhsinon ki nihayat tawil hai

mujh se meri tabahiyon ki dastan na puchh

mujh ko panah di na tere gham ne bhi kabhi

main de raha hun kitne ghamon ko aman na puchh

har zaKHm chand zaKHmon ki karta hai parwarish

kaise sada-bahaar hai ye gulsitan na puchh

dasht-e-wafa ki wusaton ko pa saka hai kaun

gum kis qadar hue hain yahan karwan na puchh

wabasta moD moD se hain kitne hadsat

ye qatl-gah hai ki dayar-e-butan na puchh