muqarrar kuchh na kuchh isMein raqibon ki bhi sazish hai

muqarrar kuchh na kuchh is meñ raqīboñ kī bhī sāzish hai

vo be-parvā ilāhī mujh pe kyuuñ garm-e-navāzish hai

pa-e-mashq-e-taġhāful aap ne maḳhsūs Thahrāyā

hameñ ye baat bhī min-jumala-e-asbāb nāzish hai

miTā de ḳhud hameñ gar shikva-e-ġham miT nahīñ saktā

jafā-e-yār se ye āḳhirī apnī guzārish hai

kahāñ mumkin kisī ko bāryābī un kī mahfil meñ

na itmīnān-e-koshish hai na ummīd-e-sifārish hai

nihāñ hai dil pazīrī jis ke har har lafz-e-shīrīñ meñ

ye kis jān-e-vafā ke haath kī rañgīñ nigārish hai

kiyā thā ek din dil ne jo dāva-e-shakebā.ī

so ab tak un ke nāz-e-dilbarī ko ham se kāvish hai

hujūm-e-yās ne be-dil kiyā aisā ki 'hasrat' ko

tire aane kī ab ummīd baaqī hai na ḳhvāhish hai

muqarrar kuchh na kuchh is mein raqibon ki bhi sazish hai

wo be-parwa ilahi mujh pe kyun garm-e-nawazish hai

pa-e-mashq-e-taghaful aap ne maKHsus Thahraya

hamein ye baat bhi min-jumala-e-asbab nazish hai

miTa de KHud hamein gar shikwa-e-gham miT nahin sakta

jafa-e-yar se ye aaKHiri apni guzarish hai

kahan mumkin kisi ko baryabi un ki mahfil mein

na itminan-e-koshish hai na ummid-e-sifarish hai

nihan hai dil paziri jis ke har har lafz-e-shirin mein

ye kis jaan-e-wafa ke hath ki rangin nigarish hai

kiya tha ek din dil ne jo dawa-e-shakebai

so ab tak un ke naz-e-dilbari ko hum se kawish hai

hujum-e-yas ne be-dil kiya aisa ki 'hasrat' ko

tere aane ki ab ummid baqi hai na KHwahish hai