musalman dekh kar ab dil ki hairani nahin jati

musalmāñ dekh kar ab dil kī hairānī nahīñ jaatī

kujā sīrat ki sūrat tak bhī pahchānī nahīñ jaatī

hadīs-e-ġham sunāne se pareshānī nahīñ jaatī

magar kuchh log haiñ jin kī ye nādānī nahīñ jaatī

janāb-e-shaiḳh bol uTTheñ ba-har mab.has ba-har mauqa

ki un kī ḳhū-e-pindār-e-hama-dānī nahīñ jaatī

sunā sail-e-tamannā meñ hazāroñ shahr-e-dil Duube

magar phir bhī tamannāoñ kī tuġhyānī nahīñ jaatī

sajāyā ham ne tasvīr-e-butāñ se ḳhāna-e-dil ko

magar bā.īñ hama us ghar kī vīrānī nahīñ jaatī

mohammad-mustafā kī shān-e-rif.at koī kyā jaane

jahāñ vo haiñ vahāñ tak fikr-e-insānī nahīñ jaatī

kiyā logoñ ne gard-ālūd kitnā chehra-e-māzī

'nazar' hairat hai phir bhī is kī tābānī nahīñ jaatī

musalman dekh kar ab dil ki hairani nahin jati

kuja sirat ki surat tak bhi pahchani nahin jati

hadis-e-gham sunane se pareshani nahin jati

magar kuchh log hain jin ki ye nadani nahin jati

janab-e-shaiKH bol uTThen ba-har mabhas ba-har mauqa

ki un ki KHu-e-pindar-e-hama-dani nahin jati

suna sail-e-tamanna mein hazaron shahr-e-dil Dube

magar phir bhi tamannaon ki tughyani nahin jati

sajaya hum ne taswir-e-butan se KHana-e-dil ko

magar bain hama us ghar ki virani nahin jati

mohammad-mustafa ki shan-e-rifat koi kya jaane

jahan wo hain wahan tak fikr-e-insani nahin jati

kiya logon ne gard-alud kitna chehra-e-mazi

'nazar' hairat hai phir bhi is ki tabani nahin jati