musalsal ashk-bari ho rahi hai

musalsal ashk-bārī ho rahī hai

mirī miTTī bahārī ho rahī hai

diye kī ek lau aur taḳhta-e-shab

ajab sūrat-nigārī ho rahī hai

ye merā kuchh na honā darj kar lo

agar mardum-shumārī ho rahī hai

maiñ jugnū aur tū itnī baḌī raat

zarā sī chiiz bhārī ho rahī hai

bahut bhārī haiñ ab miTTī kī palkeñ

badan par niiñd taarī ho rahī hai

ye bāhar shor kaisā ho rahā hai

ye kaisī mārā-mārī ho rahī hai

zarā hāthoñ meñ mere haath denā

baḌī be-aḳhtyārī ho rahī hai

ham apne aap se bichhḌe hue haiñ

tabhī to itnī ḳhvārī ho rahī hai

vahī phir yak-qalam mansūḳh huuñ maiñ

kitāb-e-ishq jaarī ho rahī hai

kahāñ rakh aa.e vo sāda-libāsī

ye kyā goTā kanārī ho rahī hai

nahīñ hotī ye harjā.ī kisī kī

to kyuuñ duniyā hamārī ho rahī hai

sunāo sher apne 'farhat-ehsās'

ye shab kyā ḳhuub qaarī ho rahī hai

musalsal ashk-bari ho rahi hai

meri miTTi bahaari ho rahi hai

diye ki ek lau aur taKHta-e-shab

ajab surat-nigari ho rahi hai

ye mera kuchh na hona darj kar lo

agar mardum-shumari ho rahi hai

main jugnu aur tu itni baDi raat

zara si chiz bhaari ho rahi hai

bahut bhaari hain ab miTTi ki palken

badan par nind tari ho rahi hai

ye bahar shor kaisa ho raha hai

ye kaisi mara-mari ho rahi hai

zara hathon mein mere hath dena

baDi be-aKHtyari ho rahi hai

hum apne aap se bichhDe hue hain

tabhi to itni KHwari ho rahi hai

wahi phir yak-qalam mansuKH hun main

kitab-e-ishq jari ho rahi hai

kahan rakh aae wo sada-libasi

ye kya goTa kanari ho rahi hai

nahin hoti ye harjai kisi ki

to kyun duniya hamari ho rahi hai

sunao sher apne 'farhat-ehsas'

ye shab kya KHub qari ho rahi hai