mushkil hai ki pahlu se juda dil nahin hota

mushkil hai ki pahlū se judā dil nahīñ hotā

aur mere satāne se vo ġhāfil nahīñ hotā

parde meñ agar us ke mirā dil nahīñ hotā

ā.īna ruḳh-e-yār ke qābil nahīñ hotā

jab qasd musammam hai to har kaar hai āsāñ

jo kaam ki mushkil hai vo mushkil nahīñ hotā

gar parda-nashīnī tujhe manzūr thī dilbar

dil merā tire vāste mahmil nahīñ hotā

mai-ḳhāna ko jaatā huuñ ye takrār abas hai

nāseh to kisī taur se qaa.il nahīñ hotā

saffāk kahā maiñ unheñ hañs ke vo bole

har sāhab-e-shamshīr to qātil nahīñ hotā

dīdār-talab kā tālib hai use jalva dikhā de

āshiq tū zar-o-māl kā saa.il nahīñ hotā

vo nūr-e-mubīñ jo ki tajallī-e-laqā hai

us kā ba-juz aadam koī hāmil nahīñ hotā

merā to patā ḳhaak bhī rahtā na 'jamīla'

gar fazl-e-ilāhī mire shāmil nahīñ hotā

mushkil hai ki pahlu se juda dil nahin hota

aur mere satane se wo ghafil nahin hota

parde mein agar us ke mera dil nahin hota

aaina ruKH-e-yar ke qabil nahin hota

jab qasd musammam hai to har kar hai aasan

jo kaam ki mushkil hai wo mushkil nahin hota

gar parda-nashini tujhe manzur thi dilbar

dil mera tere waste mahmil nahin hota

mai-KHana ko jata hun ye takrar abas hai

naseh to kisi taur se qail nahin hota

saffak kaha main unhen hans ke wo bole

har sahab-e-shamshir to qatil nahin hota

didar-talab ka talib hai use jalwa dikha de

aashiq tu zar-o-mal ka sail nahin hota

wo nur-e-mubin jo ki tajalli-e-laqa hai

us ka ba-juz aadam koi hamil nahin hota

mera to pata KHak bhi rahta na 'jamila'

gar fazl-e-ilahi mere shamil nahin hota