mushkil ko zara chhoD ke aasan ke bare

mushkil ko zarā chhoḌ ke āsān ke baare

kuchh soch mirī tañgī-e-dāmān ke baare

ik tere bulāve pe bahal jaatā hai varna

ma.alūm hai mujh ko dil-e-nādān ke baare

āġhāz-e-mohabbat meñ tavakkul hai zarūrī

mat soch kisī fā.eda nuqsān ke baare

is shahr meñ har shaḳhs ko sone kī paḌī hai

hālāñki batāyā bhī hai tūfān ke baare

is bastī-e-ḳhush-āb kī pur-kaif fazā.eñ

kab sochne detī haiñ paristān ke baare

khone kī tujhe mujh ko vahī fikr hai lāhiq

hotī hai musāfir ko jo sāmān ke baare

'ājiz' tirī duniyā ke ye insān ajab haiñ

insān ko bahkāte haiñ yazdān ke baare

mushkil ko zara chhoD ke aasan ke bare

kuchh soch meri tangi-e-daman ke bare

ek tere bulawe pe bahal jata hai warna

malum hai mujh ko dil-e-nadan ke bare

aaghaz-e-mohabbat mein tawakkul hai zaruri

mat soch kisi faeda nuqsan ke bare

is shahr mein har shaKHs ko sone ki paDi hai

haalanki bataya bhi hai tufan ke bare

is basti-e-KHush-ab ki pur-kaif fazaen

kab sochne deti hain paristan ke bare

khone ki tujhe mujh ko wahi fikr hai lahiq

hoti hai musafir ko jo saman ke bare

'ajiz' teri duniya ke ye insan ajab hain

insan ko bahkate hain yazdan ke bare