mushkil to na tha aisa bhi aflak se rishta

mushkil to na thā aisā bhī aflāk se rishta

toḌā hī nahīñ ham ne magar ḳhaak se rishta

har sub.h kī qismat kahāñ ruḳhsār kī laalī

har shab kā kahāñ dīda-e-namnāk se rishta

baḳhshī hai tujhe jis ne ḳhad-o-ḳhāl kī daulat

hai mere badan kā bhī isī chaak se rishta

chhoḌā hai kise fikr ke dariyā ne salāmat

raas aayā kise mauja-e-idrāk se rishta

'shahbāz' maiñ dhartī se huuñ mansūb kuchh aise

jaise ki kisī jism kā poshāk se rishta

mushkil to na tha aisa bhi aflak se rishta

toDa hi nahin hum ne magar KHak se rishta

har subh ki qismat kahan ruKHsar ki lali

har shab ka kahan dida-e-namnak se rishta

baKHshi hai tujhe jis ne KHad-o-KHal ki daulat

hai mere badan ka bhi isi chaak se rishta

chhoDa hai kise fikr ke dariya ne salamat

ras aaya kise mauja-e-idrak se rishta

'shahbaz' main dharti se hun mansub kuchh aise

jaise ki kisi jism ka poshak se rishta