mushkil us kuche se uThna ho gaya

mushkil us kūche se uThnā ho gayā

hashr bhī naqsh-e-kaf-e-pā ho gayā

dekh vaa.iz mujh ko maiñ kyā ho gayā

aadmī thā pī farishta ho gayā

aur hī vaadī vo hai ai ahl-e-tūr

qais jis meñ jā ke lailā ho gayā

shāḳh meñ jab tak ye hai añgūr hai

shaiḳh ne toḌā ki miinā ho gayā

tum ko samjhā huur tiira gor meñ

ai farishto mujh ko dhokā ho gayā

muñh jo ka.abe meñ khulā vaqt-e-azāñ

band nāqūs-e-kalīsā ho gayā

mai-kada vaa.iz se ab chhuTtā nahīñ

bād-e-paimā bāda-paimā ho gayā

ai buto allāh ko sauñpā tumheñ

but-kada suntā huuñ ka.aba ho gayā

baaġh tak jaate bhī haiñ aate bhī haiñ

ab qafas to ghar hamārā ho gayā

aa.egā pīne-pilāne kā mazā

pārsā ab bāda-paimā ho gayā

maut aa.ī aap kā muñh dekh kar

aap kā bīmār achchhā ho gayā

Duub jaa.eñ taare vo tūfāñ kahāñ

ashk to āñkhoñ kā taarā ho gayā

rañg badlā kyā zamāne ne 'riyāz'

dekhte hī dekhte kyā ho gayā

mushkil us kuche se uThna ho gaya

hashr bhi naqsh-e-kaf-e-pa ho gaya

dekh waiz mujh ko main kya ho gaya

aadmi tha pi farishta ho gaya

aur hi wadi wo hai ai ahl-e-tur

qais jis mein ja ke laila ho gaya

shaKH mein jab tak ye hai angur hai

shaiKH ne toDa ki mina ho gaya

tum ko samjha hur tera gor mein

ai farishto mujh ko dhoka ho gaya

munh jo kabe mein khula waqt-e-azan

band naqus-e-kalisa ho gaya

mai-kada waiz se ab chhuTta nahin

baad-e-paima baada-paima ho gaya

ai buto allah ko saunpa tumhein

but-kada sunta hun kaba ho gaya

bagh tak jate bhi hain aate bhi hain

ab qafas to ghar hamara ho gaya

aaega pine-pilane ka maza

parsa ab baada-paima ho gaya

maut aai aap ka munh dekh kar

aap ka bimar achchha ho gaya

Dub jaen tare wo tufan kahan

ashk to aankhon ka tara ho gaya

rang badla kya zamane ne 'riyaz'

dekhte hi dekhte kya ho gaya