musibaten sar-barahna hongi aqidaten be-libas hongi

musībateñ sar-barahna hoñgī aqīdateñ be-libās hoñgī

thake huoñ ko kahāñ pata thā ki sub.heñ yuuñ bad-havās hoñgī

tū dekh lenā hamāre bachchoñ ke baal jaldī safed hoñge

hamārī chhoḌī huī udāsī se saat nasleñ udaas hoñgī

kahīñ mileñ tum ko bhūrī rañgat kī gahrī āñkheñ mujhe batānā

maiñ jāntā huuñ ki aisī āñkheñ bahut aziyyat-shanās hoñgī

maiñ sardiyoñ kī ThiThurtī shāmoñ ke sard lamhoñ meñ sochtā huuñ

vo surḳh hāthoñ kī garm poreñ na-jāne ab kis ko raas hoñgī

ye jis kī beTī ke sar kī chādar ka.ī jagah se phaTī huī hai

tum us ke gaañv meñ jā ke dekho to aadhī fasleñ kapās hoñgī

musibaten sar-barahna hongi aqidaten be-libas hongi

thake huon ko kahan pata tha ki subhen yun bad-hawas hongi

tu dekh lena hamare bachchon ke baal jaldi safed honge

hamari chhoDi hui udasi se sat naslen udas hongi

kahin milen tum ko bhuri rangat ki gahri aankhen mujhe batana

main jaanta hun ki aisi aankhen bahut aziyyat-shanas hongi

main sardiyon ki ThiThurti shamon ke sard lamhon mein sochta hun

wo surKH hathon ki garm poren na-jaane ab kis ko ras hongi

ye jis ki beTi ke sar ki chadar kai jagah se phaTi hui hai

tum us ke ganw mein ja ke dekho to aadhi faslen kapas hongi