muskurahaT ke hasin phul khilae rakkhen

muskurāhaT ke hasīñ phuul khilā.e rakkheñ

apnā vīrāna-e-dil yuuñ hī basā.e rakkheñ

surḳh-rū ho ke na duniyā meñ koī jī paayā

phir bhī ye shauq ki sūrat ko sajā.e rakkheñ

aag lag jaa.e na duniyā meñ sharar se us kī

shar ke bahke hue tūfāñ ko dabā.e rakkheñ

ḳhud farāmoshī ne ehsās dilāyā aksar

dil ke zaḳhmoñ ko havā de ke sukhā.e rakkheñ

bhuul jaa.e na kahīñ shakl ye dil vāloñ kī

dīda-e-bīnā ko ā.īna banā.e rakkheñ

aaj vo aa.e haiñ apnī hī ġharaz se 'uzmā'

ghar kā dastūr hai mehmāñ se nibhā.e rakkheñ

muskurahaT ke hasin phul khilae rakkhen

apna virana-e-dil yun hi basae rakkhen

surKH-ru ho ke na duniya mein koi ji paya

phir bhi ye shauq ki surat ko sajae rakkhen

aag lag jae na duniya mein sharar se us ki

shar ke bahke hue tufan ko dabae rakkhen

KHud faramoshi ne ehsas dilaya aksar

dil ke zaKHmon ko hawa de ke sukhae rakkhen

bhul jae na kahin shakl ye dil walon ki

dida-e-bina ko aaina banae rakkhen

aaj wo aae hain apni hi gharaz se 'uzma'

ghar ka dastur hai mehman se nibhae rakkhen