muskurane ko muskuraata hun

muskurāne ko muskurātā huuñ

phir bhī ġham ko kahāñ chhupātā huuñ

husn se rang maañg laatā huuñ

aur har naqsh-e-fan sajātā huuñ

yaad aatā hai tū mujhe har dam

kyā tujhe bhī maiñ yaad aatā huuñ

shā.irī ke hasīn parde meñ

zindagī tere giit gaatā huuñ

husn ko chuum kar nigāhoñ se

husn kī aabrū baḌhātā huuñ

aaj bhī us kī yaad aate hī

saarī duniyā ko bhuul jaatā huuñ

maiñ ne bechī nahīñ hai ḳhuddārī

maiñ kisī daam meñ kab aatā huuñ

is siyāsat ke ghup añdhere meñ

shama-e-insāniyat jalātā huuñ

har jafā-jū ke sāmne jā kar

lab-e-goyā ko āzmātā huuñ

maiñ ta.assub ke bhūle-bhaTkoñ ko

sīdhe rāste pe le ke aatā huuñ

mujh sā hogā na qadr-dān-e-vaqt

ik bhī lamha nahīñ gañvātā huuñ

ik qadam jo baḌhā.e merī taraf

do qadam us kī samt uThātā huuñ

mere aañsū na koī poñchh sakā

ik zamāne ko maiñ hañsātā huuñ

dil-e-āshiq hai mere siine meñ

maiñ mohabbat ke giit gaatā huuñ

vasf-o-ḳhūbī kā huuñ satā.ish-gar

aib ko aa.ina dikhātā huuñ

kabhī auroñ kā zikr hai lab par

āp-bītī kabhī sunātā huuñ

kabhī kartā huuñ bārish-e-gul-e-tar

kabhī chiñgāriyāñ uḌātā huuñ

bazm-e-fitrat meñ baiTh kar 'maġhmūm

husn-e-fitrat ke naaz uThātā huuñ

muskurane ko muskuraata hun

phir bhi gham ko kahan chhupata hun

husn se rang mang lata hun

aur har naqsh-e-fan sajata hun

yaad aata hai tu mujhe har dam

kya tujhe bhi main yaad aata hun

shairi ke hasin parde mein

zindagi tere git gata hun

husn ko chum kar nigahon se

husn ki aabru baDhata hun

aaj bhi us ki yaad aate hi

sari duniya ko bhul jata hun

main ne bechi nahin hai KHuddari

main kisi dam mein kab aata hun

is siyasat ke ghup andhere mein

shama-e-insaniyat jalata hun

har jafa-ju ke samne ja kar

lab-e-goya ko aazmata hun

main tassub ke bhule-bhaTkon ko

sidhe raste pe le ke aata hun

mujh sa hoga na qadr-dan-e-waqt

ek bhi lamha nahin ganwata hun

ek qadam jo baDhae meri taraf

do qadam us ki samt uThata hun

mere aansu na koi ponchh saka

ek zamane ko main hansata hun

dil-e-ashiq hai mere sine mein

main mohabbat ke git gata hun

wasf-o-KHubi ka hun sataish-gar

aib ko aaina dikhata hun

kabhi auron ka zikr hai lab par

aap-biti kabhi sunata hun

kabhi karta hun barish-e-gul-e-tar

kabhi chingariyan uData hun

bazm-e-fitrat mein baiTh kar 'maghmum

husn-e-fitrat ke naz uThata hun