muskurane pe unhen kis liye ruswa karte

muskurāne pe unheñ kis liye rusvā karte

baat hī kyā thī ki jis baat kā charchā karte

likhnā paḌtī jo kabhī un ke sarāpā pe ġhazal

pahroñ tanhā.ī meñ baiThe hue sochā karte

vo to yuuñ kahiye ki dekhā nahīñ un ko varna

dekh lete jo unheñ log to dekhā karte

ab hameñ apnī tabāhī meñ koī shak na rahā

ham ne ḳhud dekh liyā un ko ishāra karte

sham.a yādoñ kī farozāñ thī farozāñ hī rahī

tīrgī ghar meñ jo hotī to ujālā karte

ham ko shohrat kī na ḳhvāhish na tamannā koī

bhuul jaate jo hameñ log to achchhā karte

haath aatā jo kabhī jins kī sūrat ai dost

ahl-e-fan apne ḳhayāloñ kā bhī saudā karte

sang aur ḳhisht ke bāzār meñ kyoñ baiTh ga.e

log ā.īne ko kis tarah gavārā karte

apne ahbāb se shikva hai yahī ham ko 'sirāj'

der lagtī hī nahīñ jhūTe ko sachchā karte

muskurane pe unhen kis liye ruswa karte

baat hi kya thi ki jis baat ka charcha karte

likhna paDti jo kabhi un ke sarapa pe ghazal

pahron tanhai mein baiThe hue socha karte

wo to yun kahiye ki dekha nahin un ko warna

dekh lete jo unhen log to dekha karte

ab hamein apni tabahi mein koi shak na raha

hum ne KHud dekh liya un ko ishaara karte

shama yaadon ki farozan thi farozan hi rahi

tirgi ghar mein jo hoti to ujala karte

hum ko shohrat ki na KHwahish na tamanna koi

bhul jate jo hamein log to achchha karte

hath aata jo kabhi jins ki surat ai dost

ahl-e-fan apne KHayalon ka bhi sauda karte

sang aur KHisht ke bazar mein kyon baiTh gae

log aaine ko kis tarah gawara karte

apne ahbab se shikwa hai yahi hum ko 'siraj'

der lagti hi nahin jhuTe ko sachcha karte