mustaqbil ke KHwab sajaana mushkil hai

mustaqbil ke ḳhvāb sajānā mushkil hai

ab yādoñ se dil bahlānā mushkil hai

jin galiyoñ meñ yaar kā dāman chhūTā thā

un galiyoñ meñ ānā-jānā mushkil hai

kuchh kirdār nibhā.e itnī shiddat se

merā apne aap meñ aanā mushkil hai

āvāzoñ se zaḳhm hue haiñ kuchh aise

sannāToñ ko bhī sun paanā mushkil hai

aañsū to chhup sakte haiñ is duniyā se

lekin dil kī aah chhupānā mushkil hai

ġhaflat ke jo lamhe zillat de jaa.eñ

un lamhoñ kā bojh uThānā mushkil hai

maqtal meñ ik shart uThī thī tauba kī

hañs kar bolā ik dīvānā mushkil hai

is duniyā meñ sab kuchh āsāñ hai 'kāfir'

bas ik sachchā ishq kamānā mushkil hai

mustaqbil ke KHwab sajaana mushkil hai

ab yaadon se dil bahlana mushkil hai

jin galiyon mein yar ka daman chhuTa tha

un galiyon mein aana-jaana mushkil hai

kuchh kirdar nibhae itni shiddat se

mera apne aap mein aana mushkil hai

aawazon se zaKHm hue hain kuchh aise

sannaTon ko bhi sun pana mushkil hai

aansu to chhup sakte hain is duniya se

lekin dil ki aah chhupana mushkil hai

ghaflat ke jo lamhe zillat de jaen

un lamhon ka bojh uThana mushkil hai

maqtal mein ek shart uThi thi tauba ki

hans kar bola ek diwana mushkil hai

is duniya mein sab kuchh aasan hai 'kafir'

bas ek sachcha ishq kamana mushkil hai