mustaqil mahw-e-gham-e-ahd-e-guzishta hona

mustaqil mahv-e-ġham-e-ahd-e-guzishta honā

aise hone se to behtar hai na dil kā honā

maiñ huuñ insāñ mujhe insān hī rahne diije

mat sikhā.eñ mujhe har gaam farishta honā

dekhnī paḌtī haiñ har moḌ pe udhḌī lāsheñ

kitnā dushvār hai is shahr meñ biinā honā

ai musavvir zarā tasvīr meñ manzar ye utaar

do kināroñ ko hai dekhā gayā yakjā honā

haiñ farāham mujhe be-rāh-ravī ke asbāb

zeb degā mujhe āvāra-e-duniyā honā

bastiyāñ shahr-e-ḳhamoshāñ kī tarah haiñ ābād

zinda logoñ ko lubhāne lagā murda honā

ḳhud hī gir jā.egī zindān-e-badan kī dīvār

rūh-e-afsurda ko bechain bhalā kyā honā

khā gayā raunaqeñ paivand-o-marāsim kī 'nadīm'

jins-e-iḳhlās kā bāzār meñ sastā honā

mustaqil mahw-e-gham-e-ahd-e-guzishta hona

aise hone se to behtar hai na dil ka hona

main hun insan mujhe insan hi rahne dije

mat sikhaen mujhe har gam farishta hona

dekhni paDti hain har moD pe udhDi lashen

kitna dushwar hai is shahr mein bina hona

ai musawwir zara taswir mein manzar ye utar

do kinaron ko hai dekha gaya yakja hona

hain faraham mujhe be-rah-rawi ke asbab

zeb dega mujhe aawara-e-duniya hona

bastiyan shahr-e-KHamoshan ki tarah hain aabaad

zinda logon ko lubhane laga murda hona

KHud hi gir jaegi zindan-e-badan ki diwar

ruh-e-afsurda ko bechain bhala kya hona

kha gaya raunaqen paiwand-o-marasim ki 'nadim'

jins-e-iKHlas ka bazar mein sasta hona