mutalea ki hawas hai kitab de jao

mutāle.a kī havas hai kitāb de jaao

hamāre ahd ko sāleh nisāb de jaao

shahpar-e-ilm kī jholī kamāl se ḳhālī

ḳhudā ke vāste koī ḳhitāb de jaao

kabhī to hurmat-e-sairābi-e-nazar khul jaa.e

samundaroñ ko tilism-e-sarāab de jaao

haqīqatoñ ko tamāshā nahīñ banā.ūñgā

munāfiqat kī havā hai naqāb de jaao

tumhārī āḳhirī ummīd ban ke lauTūñgā

vidā kī ghaḌiyoñ kā hisāb de jaao

qadīm raushniyoñ se unheñ shikāyat hai

to shapparoñ ko nayā āftāb de jaao

koī to mashġhala-e-nā-murād jaarī ho

zabāñ ko badriqa-e-inqilāb de jaao

isī meñ ḳhanda-labī shān-e-be-niyāzī hai

har ek tiir kā sākit javāb de jaao

safar-e-nasīb hai 'rāhī' misāl-e-bād-e-ravāñ

jahāt-e-shash kī zamām o rikāb de jaao

mutalea ki hawas hai kitab de jao

hamare ahd ko saleh nisab de jao

shahpar-e-ilm ki jholi kamal se KHali

KHuda ke waste koi KHitab de jao

kabhi to hurmat-e-sairabi-e-nazar khul jae

samundaron ko tilism-e-saraab de jao

haqiqaton ko tamasha nahin banaunga

munafiqat ki hawa hai naqab de jao

tumhaari aaKHiri ummid ban ke lauTunga

wida ki ghaDiyon ka hisab de jao

qadim raushniyon se unhen shikayat hai

to shapparon ko naya aaftab de jao

koi to mashghala-e-na-murad jari ho

zaban ko badriqa-e-inqilab de jao

isi mein KHanda-labi shan-e-be-niyazi hai

har ek tir ka sakit jawab de jao

safar-e-nasib hai 'rahi' misal-e-baad-e-rawan

jahat-e-shash ki zamam o rikab de jao