mund kar bas aankh apni un manazir ke KHilaf

muuñd kar bas aañkh apnī un manāzir ke ḳhilāf

kar rahe haiñ ham baġhāvat daur-e-hāzir ke ḳhilāf

tujh talak āvāz merī jaate jaate kho ga.ī

rāste sab ho ga.e haiñ is musāfir ke ḳhilāf

hausla jo hai to lalkāro ḳhudā ko bhī kabhī

kyā milegā tum ko ho kar ham se kāfir ke ḳhilāf

ek adnā dil ke hāthoñ donoñ haiñ majbūr ham

aao thāmeñ haath ham us shai-e-shātir ke ḳhilāf

ik taraf thā maiñ nihatthā ik taraf vo gul-badan

ishq kī baazī maiñ haarā ek māhir ke ḳhilāf

ek ik kar ke sabhī purze usī ke ho ga.e

ab badan meñ huuñ maiñ tanhā husn-e-jābir ke ḳhilāf

'āshnā' phir ḳhvāb meñ aayā nahīñ tū raat bhar

tū bhī shāyad ho gayā hai ek shā.ir ke ḳhilāf

mund kar bas aankh apni un manazir ke KHilaf

kar rahe hain hum baghawat daur-e-hazir ke KHilaf

tujh talak aawaz meri jate jate kho gai

raste sab ho gae hain is musafir ke KHilaf

hausla jo hai to lalkaro KHuda ko bhi kabhi

kya milega tum ko ho kar hum se kafir ke KHilaf

ek adna dil ke hathon donon hain majbur hum

aao thamen hath hum us shai-e-shatir ke KHilaf

ek taraf tha main nihattha ek taraf wo gul-badan

ishq ki bazi main haara ek mahir ke KHilaf

ek ek kar ke sabhi purze usi ke ho gae

ab badan mein hun main tanha husn-e-jabir ke KHilaf

'ashna' phir KHwab mein aaya nahin tu raat bhar

tu bhi shayad ho gaya hai ek shair ke KHilaf