muzhda ai zauq-e-asiri ki nazar aata hai

muzhda ai zauq-e-asīrī ki nazar aatā hai

dām-e-ḳhālī qafas-e-murġh-e-giraftār ke paas

jigar-e-tishna-e-āzār tasallī na huā

jū-e-ḳhūñ ham ne bahā.ī bun-e-har ḳhaar ke paas

muñd ga.iiñ kholte hī kholte āñkheñ hai hai

ḳhuub vaqt aa.e tum is āshiq-e-bīmār ke paas

maiñ bhī ruk ruk ke na martā jo zabāñ ke badle

dashna ik tez sā hotā mire ġham-ḳhvār ke paas

dahan-e-sher meñ jā baiThe lekin ai dil

na khaḌe ho jiye ḳhūbān-e-dil-āzār ke paas

dekh kar tujh ko chaman bas-ki numū kartā hai

ḳhud-ba-ḳhud pahuñche hai gul gosha-e-dastār ke paas

mar gayā phoḌ ke sar 'ġhālib'-e-vahshī hai hai

baiThnā us kā vo aa kar tirī dīvār ke paas

muzhda ai zauq-e-asiri ki nazar aata hai

dam-e-KHali qafas-e-murgh-e-giraftar ke pas

jigar-e-tishna-e-azar tasalli na hua

ju-e-KHun hum ne bahai bun-e-har KHar ke pas

mund gain kholte hi kholte aankhen hai hai

KHub waqt aae tum is aashiq-e-bimar ke pas

main bhi ruk ruk ke na marta jo zaban ke badle

dashna ek tez sa hota mere gham-KHwar ke pas

dahan-e-sher mein ja baiThe lekin ai dil

na khaDe ho jiye KHuban-e-dil-azar ke pas

dekh kar tujh ko chaman bas-ki numu karta hai

KHud-ba-KHud pahunche hai gul gosha-e-dastar ke pas

mar gaya phoD ke sar 'ghaalib'-e-wahshi hai hai

baiThna us ka wo aa kar teri diwar ke pas