na aae wo pahle tawaqquf kiya

na aa.e vo pahle tavaqquf kiyā

mue ham to kyā kyā ta.assuf kiyā

milā zahr agar haath se yaar ke

use nosh-e-jāñ be-takalluf kiyā

mare kyoñ na duniyā zuleḳhā kī tarh

ḳhudā ne tumheñ rashk-e-yūsuf kiyā

agar ganj-e-qārūñ bhī haath aa gayā

usī vaqt ham ne tasarruf kiyā

faqat sūf-poshī pe paayā madār

jo daryāft hāl-e-tasavvuf kiyā

mire ghar meñ tashrīf laa.e jo tum

ināyat ināyat talattuf kiyā

rahā yaad mutlaq na ahd-e-alast

jo va.ada thā us meñ taḳhalluf kiyā

mire dāġh-e-dil kī jo pahuñchī havā

jahannum ne bhī shor uf uf kiyā

piyā ḳhūn-e-dil luqma-e-ġham ke saath

ġhizā meñ jo ham ne takalluf kiyā

muārrif hai allāh bhī husn kā

ki qur.ān meñ zikr-e-yūsuf kiyā

ġhalat kyoñ na dīvāñ ho merā 'asīr'

ki kātib ne is meñ tasarruf kiyā

na aae wo pahle tawaqquf kiya

mue hum to kya kya tassuf kiya

mila zahr agar hath se yar ke

use nosh-e-jaan be-takalluf kiya

mare kyon na duniya zuleKHa ki tarh

KHuda ne tumhein rashk-e-yusuf kiya

agar ganj-e-qarun bhi hath aa gaya

usi waqt hum ne tasarruf kiya

faqat suf-poshi pe paya madar

jo daryaft haal-e-tasawwuf kiya

mere ghar mein tashrif lae jo tum

inayat inayat talattuf kiya

raha yaad mutlaq na ahd-e-alast

jo wada tha us mein taKHalluf kiya

mere dagh-e-dil ki jo pahunchi hawa

jahannum ne bhi shor uf uf kiya

piya KHun-e-dil luqma-e-gham ke sath

ghiza mein jo hum ne takalluf kiya

muarrif hai allah bhi husn ka

ki quran mein zikr-e-yusuf kiya

ghalat kyon na diwan ho mera 'asir'

ki katib ne is mein tasarruf kiya