نہ بچ پاؤں گا میں کہ بیویاں دونوں طرف سے ہیں

نہ بچ پاؤں گا میں کہ بیویاں دونوں طرف سے ہیں

مرے سر پر برستی جوتیاں دونوں طرف سے ہیں

ملی ہے چور سے پولس ملا غنڈوں سے ہر نیتا

ازل سے ان میں ساجھے داریاں دونوں طرف سے ہیں

نہ لڑکے کو پسند لڑکی نہ لڑکی کو پسند لڑکا

مگر شادی کی سب تیاریاں دونوں طرف سے ہیں

دما کی وہ مریضہ ہے مجھے کھانسی نے گھیرا ہے

بڑھاپے میں بڑی مجبوریاں دونوں طرف سے ہیں

وہ ہو سسرال یا میکہ یہ کہتی ہے بہو مجھ سے

میرے کاندھے پہ ذمہ داریاں دونوں طرف سے ہیں

منسٹر ہوں کہ چپراسی وہ اچھا ہو نہیں سکتا

کہ پبلک کے لئے مکاریاں دونوں طرف سے ہیں

ترنم ہی کچھ ایسا تھا بچارہ کیا کرے واحدؔ

کہ ہلڑ اور نعرے بازیاں دونوں طرف سے ہیں