na bhulega KHayal o rang-e-ruKH ka nama-bar hona

na bhūlegā ḳhayāl o rang-e-ruḳh kā nāma-bar honā

hadīs-e-shauq se harf-o-zabāñ kā be-ḳhabar honā

muhīt-e-dahr kī har mauj hai ik lahr bijlī kī

mubārak āh-e-muztar ko tirī barq-e-nazar honā

shikāyat-sanj-e-qudrat kyoñ na ho majbūrī-e-bulbul

qafas hī meñ thā kyā josh-e-numū se bāl-o-par honā

mirī aahoñ kī halchal hai nizām-e-dahr barham hai

nidā.eñ aa rahī haiñ aaj mushkil hai sahar honā

khule haiñ dil ke hāthoñ aah asrār-e-junūñ kyā kyā

qayāmat kar gayā is rāzdāñ kā parda-dar honā

ye baḌhte valvale ye josh-e-gul ye apnī majbūrī

qafas se chhūT kar qismat meñ thā be-bāl-o-par honā

rah-e-vahshat kī uThtī āñdhiyoñ kā haal kahtā hai

sarāpā kārvān-e-shauq kā gard-e-safar honā

qafas meñ fasl-e-gul kī kyā ḳhabar haañ kuchh to kahtā hai

faqat ik vaqt meñ josh-e-numū-e-bāl-o-par honā

zamāna mahv-e-hairat aur vo majbūr-e-tabassum hai

tilism-e-rāz hai 'beḳhud' mirī mizhgāñ kā tar honā

na bhulega KHayal o rang-e-ruKH ka nama-bar hona

hadis-e-shauq se harf-o-zaban ka be-KHabar hona

muhit-e-dahr ki har mauj hai ek lahr bijli ki

mubarak aah-e-muztar ko teri barq-e-nazar hona

shikayat-sanj-e-qudrat kyon na ho majburi-e-bulbul

qafas hi mein tha kya josh-e-numu se baal-o-par hona

meri aahon ki halchal hai nizam-e-dahr barham hai

nidaen aa rahi hain aaj mushkil hai sahar hona

khule hain dil ke hathon aah asrar-e-junun kya kya

qayamat kar gaya is raazdan ka parda-dar hona

ye baDhte walwale ye josh-e-gul ye apni majburi

qafas se chhuT kar qismat mein tha be-baal-o-par hona

rah-e-wahshat ki uThti aandhiyon ka haal kahta hai

sarapa karwan-e-shauq ka gard-e-safar hona

qafas mein fasl-e-gul ki kya KHabar han kuchh to kahta hai

faqat ek waqt mein josh-e-numu-e-baal-o-par hona

zamana mahw-e-hairat aur wo majbur-e-tabassum hai

tilism-e-raaz hai 'beKHud' meri mizhgan ka tar hona