na chheD tazkire hargiz gham-e-nihani par

na chheḌ tazkire hargiz ġham-e-nihānī par

vo shaḳhs ro na paḌe ġham kī tarjumānī par

na varġhalā.iye sāhab hameñ mohabbat se

hameñ yaqīñ na gumāñ 'ishq kī kahānī par

sitam uThāyā kiye aur suḳhan-shanās hue

ye tajraba bhī kiyā apnī be-zabānī par

ye shahr jhuuT kā haamī hai haq-parasto yahāñ

zabāneñ kaaT dī jaatī haiñ haq-bayānī par

muhāl hai ki tire dar se uTh ke jā pā.ūñ

ye jaan sadqe magar aisī nā-tavānī par

sila yahī hai vafāoñ kā jāntā huuñ maiñ

so ġham-zada maiñ nahīñ apnī rā.egānī par

jinheñ shu'ūr nahīñ kuchh bhī she’r-goī kā

vo tanz kas rahe haiñ merī she’r-ḳhvānī par

bajā.e ḳhushbū ke vahshat bikhertī hai 'karan'

tilism phūñk diyā kis ne rāt-rānī par

na chheD tazkire hargiz gham-e-nihani par

wo shaKHs ro na paDe gham ki tarjumani par

na warghalaiye sahab hamein mohabbat se

hamein yaqin na guman 'ishq ki kahani par

sitam uThaya kiye aur suKHan-shanas hue

ye tajraba bhi kiya apni be-zabani par

ye shahr jhuT ka hami hai haq-parasto yahan

zabanen kaT di jati hain haq-bayani par

muhaal hai ki tere dar se uTh ke ja paun

ye jaan sadqe magar aisi na-tawani par

sila yahi hai wafaon ka jaanta hun main

so gham-zada main nahin apni raegani par

jinhen shu'ur nahin kuchh bhi she’r-goi ka

wo tanz kas rahe hain meri she’r-KHwani par

bajae KHushbu ke wahshat bikherti hai 'karan'

tilism phunk diya kis ne raat-rani par