na chhin le kahin tanhai Dar sa rahta hai

na chhīn le kahīñ tanhā.ī Dar sā rahtā hai

mire makāñ meñ vo dīvār-o-dar sā rahtā hai

kabhī kabhī to ubhartī hai chīḳh sī koī

kahīñ kahīñ mire andar khañDar sā rahtā hai

vo āsmāñ ho ki parchhā.īñ ho ki terā ḳhayāl

koī to hai jo mirā ham-safar sā rahtā hai

maiñ joḌ joḌ ke jis ko zamāna kartā huuñ

vo mujh meñ TuuTā huā lamha bhar sā rahtā hai

zarā sā nikle to ye shahr ulaT palaT jaa.e

vo apne ghar meñ bahut be-zarar sā rahtā hai

bulā rahā thā vo dariyā ke paar se ik din

jabhī se paañv meñ mere bhañvar sā rahtā hai

na jaane kaisī girānī uThā.e phirtā huuñ

na jaane kyā mire kāñdhe pe sar sā rahtā hai

chalo 'salīm' zarā kuchh ilāj-e-jāñ kar leñ

yahīñ kahīñ pe koī chāra-gar sā rahtā hai

na chhin le kahin tanhai Dar sa rahta hai

mere makan mein wo diwar-o-dar sa rahta hai

kabhi kabhi to ubharti hai chiKH si koi

kahin kahin mere andar khanDar sa rahta hai

wo aasman ho ki parchhain ho ki tera KHayal

koi to hai jo mera ham-safar sa rahta hai

main joD joD ke jis ko zamana karta hun

wo mujh mein TuTa hua lamha bhar sa rahta hai

zara sa nikle to ye shahr ulaT palaT jae

wo apne ghar mein bahut be-zarar sa rahta hai

bula raha tha wo dariya ke par se ek din

jabhi se panw mein mere bhanwar sa rahta hai

na jaane kaisi girani uThae phirta hun

na jaane kya mere kandhe pe sar sa rahta hai

chalo 'salim' zara kuchh ilaj-e-jaan kar len

yahin kahin pe koi chaara-gar sa rahta hai