na dosti ki tarah hai na dushmani ki tarah

na dostī kī tarah hai na dushmanī kī tarah

ye iltifāt tumhārā hai ajnabī kī tarah

vahī to lamhe matā-e-hayāt hote haiñ

ġhamoñ ke saa.e meñ palte haiñ jo ḳhushī kī tarah

jalā sake to jalā soz-e-ishq yuuñ mujh ko

ki kā.enāt pe chhā jā.ūñ raushnī kī tarah

ye kis maqām pe pahuñchā hai kārvān-e-hayāt

jahāñ ḳhudī kā bhī aalam hai be-ḳhudī kī tarah

nazar meñ un kā tasavvur hai jaam hāthoñ meñ

hamārī bāda-parastī hai bandagī kī tarah

vo hañs paḌe mirī vahshat pe yuuñ sar-e-mahfil

har ek zaḳhm-e-jigar khil gayā kalī kī tarah

zarūr 'dard' koī māh-vash hai gulshan meñ

sabā ne phuul khilā.e haiñ chāñdnī kī tarah

na dosti ki tarah hai na dushmani ki tarah

ye iltifat tumhaara hai ajnabi ki tarah

wahi to lamhe mata-e-hayat hote hain

ghamon ke sae mein palte hain jo KHushi ki tarah

jala sake to jala soz-e-ishq yun mujh ko

ki kaenat pe chha jaun raushni ki tarah

ye kis maqam pe pahuncha hai karwan-e-hayat

jahan KHudi ka bhi aalam hai be-KHudi ki tarah

nazar mein un ka tasawwur hai jam hathon mein

hamari baada-parasti hai bandagi ki tarah

wo hans paDe meri wahshat pe yun sar-e-mahfil

har ek zaKHm-e-jigar khil gaya kali ki tarah

zarur 'dard' koi mah-wash hai gulshan mein

saba ne phul khilae hain chandni ki tarah