na ehtiram na dil mein adab ka hota hai

na ehtirām na dil meñ adab kā hotā hai

hamesha mas.ala nām-o-nasab kā hotā hai

maqāmī shai pe kisī ko bhī e.atibār nahīñ

hamārā maulvī tak bhī arab kā hotā hai

ziyāda farq nahīñ dahriyoñ meñ aur ham meñ

koī na koī aqīda to sab kā hotā hai

talāsh mujh ko bhī rahtī hai ik bahāne kī

aur intizār use bhī sabab kā hotā hai

dilāsa de ke yahī chup karā diyā gayā huuñ

ki jo bhī faisla hotā hai rab kā hotā hai

ziyāda umr nahīñ hai kisī patange kī

hamārā khel faqat ek shab kā hotā hai

tumhārī marzī mohabbat kaho ise ki havas

hamāre dil meñ to jazba talab kā hotā hai

haqīr chiiz kabhī ḳhaak meñ nahīñ miltī

ye haal sirf kisī muntaḳhab kā hotā hai

na ehtiram na dil mein adab ka hota hai

hamesha masala nam-o-nasab ka hota hai

maqami shai pe kisi ko bhi eatibar nahin

hamara maulwi tak bhi arab ka hota hai

ziyaada farq nahin dahriyon mein aur hum mein

koi na koi aqida to sab ka hota hai

talash mujh ko bhi rahti hai ek bahane ki

aur intizar use bhi sabab ka hota hai

dilasa de ke yahi chup kara diya gaya hun

ki jo bhi faisla hota hai rab ka hota hai

ziyaada umr nahin hai kisi patange ki

hamara khel faqat ek shab ka hota hai

tumhaari marzi mohabbat kaho ise ki hawas

hamare dil mein to jazba talab ka hota hai

haqir chiz kabhi KHak mein nahin milti

ye haal sirf kisi muntaKHab ka hota hai