na fasle koi rakhna na qurbaten rakhna

na fāsle koī rakhnā na qurbateñ rakhnā

bas ab ba-qadr-e-ġhazal us se nisbateñ rakhnā

ye kis ta.alluq-e-ḳhātir kā de rahā hai surāġh

kabhī kabhī tirā mujh se shikāyateñ rakhnā

maiñ apne sach ko chhupā.ūñ to ruuh shor machā.e

azaab ho gayā merā samā.ateñ rakhnā

fazā-e-shahr meñ ab ke baḌī kudūrat hai

bahut sambhāl ke apnī mohabbateñ rakhnā

ham ahl-e-fan ko bhī gum-nāmiyāñ thiiñ raas bahut

huā hai bā.is-e-rusvā.ī shohrateñ rakhnā

qasīda-ḳhvāni karo aur mauj uḌaao ki 'shauq'

tamām kār-e-ziyāñ hai sadāqateñ rakhnā

na fasle koi rakhna na qurbaten rakhna

bas ab ba-qadr-e-ghazal us se nisbaten rakhna

ye kis talluq-e-KHatir ka de raha hai suragh

kabhi kabhi tera mujh se shikayaten rakhna

main apne sach ko chhupaun to ruh shor machae

azab ho gaya mera samaaten rakhna

faza-e-shahr mein ab ke baDi kudurat hai

bahut sambhaal ke apni mohabbaten rakhna

hum ahl-e-fan ko bhi gum-namiyan thin ras bahut

hua hai bais-e-ruswai shohraten rakhna

qasida-KHwani karo aur mauj uDao ki 'shauq'

tamam kar-e-ziyan hai sadaqaten rakhna