na gham-e-dil na fikr-e-jaan hai yaad

na ġham-e-dil na fikr-e-jāñ hai yaad

ek terī hī bar zabāñ hai yaad

thā jo kuchh vāda-e-vafā ham se

kuchh bhī vo tum ko mehrbāñ hai yaad

agle milne kī tarah bhuul ga.e

kyā batā.ūñ tumheñ kahāñ hai yaad

huuñ maiñ pāband-e-ulfat-e-sayyād

kab mujhe bāġh-o-bostāñ hai yaad

mahv tere hī rū-o-zulf ke haiñ

na hameñ vo na ye jahāñ hai yaad

dīda-o-dil meñ tū hī bastā hai

tujh sivā kis kī aur yaañ hai yaad

aur kuchh aarzū nahīñ 'bedār'

ek us kī hī jāvedāñ hai yaad

na gham-e-dil na fikr-e-jaan hai yaad

ek teri hi bar zaban hai yaad

tha jo kuchh wada-e-wafa hum se

kuchh bhi wo tum ko mehrban hai yaad

agle milne ki tarah bhul gae

kya bataun tumhein kahan hai yaad

hun main paband-e-ulfat-e-sayyaad

kab mujhe bagh-o-bostan hai yaad

mahw tere hi ru-o-zulf ke hain

na hamein wo na ye jahan hai yaad

dida-o-dil mein tu hi basta hai

tujh siwa kis ki aur yan hai yaad

aur kuchh aarzu nahin 'bedar'

ek us ki hi jawedan hai yaad