na garmi rakhe koi us se KHudaya

na garmī rakhe koī us se ḳhudāyā

sharārat se jī jis ne merā jalāyā

na bechain ho koī ab us kī ḳhātir

mirā chāhnā jo na ḳhātir meñ laayā

baham dekh do shaḳhs ho vo bhī muztar

akelā maiñ jis ke liye tilmilāyā

phire justujū meñ na ab koī us kī

mujhe jis ne galiyoñ meñ barsoñ phirāyā

na bhūle se yaad ab kare koī us ko

mirā yaad karnā bhī jis ne bhulāyā

na ḳhush ho ab us paas baiThe se koī

hameñ kar ke āzurda jis ne uThāyā

ḳharīdār paidā na ho koī us kā

ki dil bech kar ham ne dukh jis se paayā

tahayyur ho dekh ā.īna us ko jis ne

hameñ kar ke hairāñ na mukhḌā dikhāyā

lage laag us se kisī kī na yā-rab

hamārī lagī ko na jis ne bujhāyā

kahūñ dāstāñ maiñ gar apnī aur us kī

to hairān ho sun ke apnā parāyā

ki pahle kī iz.hār ḳhud us ne ulfat

na aayā to sau baar ghar se bulāyā

jatā.īñ vo bāteñ jinheñ sehr kahiye

dikhāyā vo aalam ki vahshī banāyā

rakhī be-takalluf mulāqāt chande

ba-mannat mujhe paas pahroñ biThāyā

kisī kā na ik harf ḳhātir meñ guzrā

use garche logoñ ne kyā kyā paḌhāyā

so ab vo jhalak tak dikhātā nahīñ hai

gayā maiñ jo ghar se to dar tak na aayā

lagāvaT ye kuchh kar ke phir kyā ġhazab hai

mirā lag gayā dil to parda lagāyā

ba-taġh.īr-e-bahr aur 'jur.at' ġhazal kah

ki ye turfa mazmūn tū ne sunāyā

na garmi rakhe koi us se KHudaya

shararat se ji jis ne mera jalaya

na bechain ho koi ab us ki KHatir

mera chahna jo na KHatir mein laya

baham dekh do shaKHs ho wo bhi muztar

akela main jis ke liye tilmilaya

phire justuju mein na ab koi us ki

mujhe jis ne galiyon mein barson phiraya

na bhule se yaad ab kare koi us ko

mera yaad karna bhi jis ne bhulaya

na KHush ho ab us pas baiThe se koi

hamein kar ke aazurda jis ne uThaya

KHaridar paida na ho koi us ka

ki dil bech kar hum ne dukh jis se paya

tahayyur ho dekh aaina us ko jis ne

hamein kar ke hairan na mukhDa dikhaya

lage lag us se kisi ki na ya-rab

hamari lagi ko na jis ne bujhaya

kahun dastan main gar apni aur us ki

to hairan ho sun ke apna paraya

ki pahle ki izhaar KHud us ne ulfat

na aaya to sau bar ghar se bulaya

jatain wo baaten jinhen sehr kahiye

dikhaya wo aalam ki wahshi banaya

rakhi be-takalluf mulaqat chande

ba-mannat mujhe pas pahron biThaya

kisi ka na ek harf KHatir mein guzra

use garche logon ne kya kya paDhaya

so ab wo jhalak tak dikhata nahin hai

gaya main jo ghar se to dar tak na aaya

lagawaT ye kuchh kar ke phir kya ghazab hai

mera lag gaya dil to parda lagaya

ba-taghir-e-bahr aur 'jurat' ghazal kah

ki ye turfa mazmun tu ne sunaya