na gul na sarw miyan-e-bahaar hota hai

na gul na sarv miyān-e-bahār hotā hai

hamārī ḳhaak se paidā chinār hotā hai

kabhī jo jalva-e-ruḳhsār-e-yār hotā hai

charāġh-e-tūr charāġh-e-mazār hotā hai

uThā janāza jo merā qazā lagī kahne

ki jo piyāda hai āḳhir savār hotā hai

milā ke ḳhaak meñ tan ko ga.ī bahisht meñ ruuh

kisī kā kaun zamāne meñ yaar hotā hai

bajā hai taḳht-e-sulaimāñ pe bhī jo maarī laat

har ek murġh yahāñ tājdār hotā hai

na apne ghar meñ mujhe ġhair se milā ai huur

bahisht meñ ye azāb-e-fishār hotā hai

'urūj 'arsh' jo manzūr hai jalā dil ko

ki aag lagtī hai jab sard anaar hotā hai

na gul na sarw miyan-e-bahaar hota hai

hamari KHak se paida chinar hota hai

kabhi jo jalwa-e-ruKHsar-e-yar hota hai

charagh-e-tur charagh-e-mazar hota hai

uTha janaza jo mera qaza lagi kahne

ki jo piyaada hai aaKHir sawar hota hai

mila ke KHak mein tan ko gai bahisht mein ruh

kisi ka kaun zamane mein yar hota hai

baja hai taKHt-e-sulaiman pe bhi jo mari lat

har ek murgh yahan tajdar hota hai

na apne ghar mein mujhe ghair se mila ai hur

bahisht mein ye azab-e-fishaar hota hai

'uruj 'arsh' jo manzur hai jala dil ko

ki aag lagti hai jab sard anar hota hai