na hum dua se ab na wafa se talab karen

na ham duā se ab na vafā se talab kareñ

ishq-e-butāñ meñ sabr ḳhudā se talab kareñ

dil ḳhaak ho gayā hai tirī rahguzār meñ

gar jā sakeñ vahāñ to sabā se talab kareñ

āḳhir ḳhushī to ishq se hāsil na kuchh huī

ham ab ġham-o-alam hī balā se talab kareñ

ġhamze ne le ke dil ko adā ke kiyā supurd

ġhamze se dil ko leñ ki adā se talab kareñ

daulat jo faqr kī hai so hai apne dil ke paas

vo chiiz ye nahīñ ki gadā se talab kareñ

darvāza go khulā hai ijābat kā par 'hasan'

ham kis kis aarzū ko ḳhudā se talab kareñ

na hum dua se ab na wafa se talab karen

ishq-e-butan mein sabr KHuda se talab karen

dil KHak ho gaya hai teri rahguzar mein

gar ja saken wahan to saba se talab karen

aaKHir KHushi to ishq se hasil na kuchh hui

hum ab gham-o-alam hi bala se talab karen

ghamze ne le ke dil ko ada ke kiya supurd

ghamze se dil ko len ki ada se talab karen

daulat jo faqr ki hai so hai apne dil ke pas

wo chiz ye nahin ki gada se talab karen

darwaza go khula hai ijabat ka par 'hasan'

hum kis kis aarzu ko KHuda se talab karen