na hamari hai ye urdu na tumhaari urdu

na hamārī hai ye urdu na tumhārī urdu

balki har qaum kī hai rāj-dulārī urdu

sar kiye is ne akele hī hazāroñ maidāñ

kisī maidān meñ ab tak nahīñ haarī urdu

ab bhī stage pe bhāshan jo diyā jaatā hai

bolte is meñ bhī haiñ raam bihārī urdu

is ko har mulk kā insān samajh letā hai

is se har shaḳhs ko hai aaj bhī pyārī urdu

jo muḳhālif haiñ ba-zāhir unheñ ma.alūm nahīñ

raat din boltī hai un kī kahārī urdu

paak har aib se hai aur bhī dāman is kā

gangā jamunā ke hai paanī se nikhārī urdu

kahīñ 'ġhālib' kī haiñ nazmeñ kahīñ chakbast kī haiñ

sheḳh-o-panDit ne hai mil-jul ke sañvārī urdu

aaj sannāTe meñ kahtī hai ye bhārat maatā

tum ko ma.alūm nahīñ ham ko hai pyārī urdu

dostoñ ke liye paiġhām-e-masarrat hai magar

dushmanoñ ke liye be-shak hai kaTārī urdu

coat patlūn pahan kar bhī na chhoḌī ham ne

ham ne khaddar kī banā Daalī hai saarī urdu

naujavānān-e-vatan se hai ye 'nāvak' kā payām

marte marte bhī zabāñ par rahe jaarī urdu

na hamari hai ye urdu na tumhaari urdu

balki har qaum ki hai raj-dulari urdu

sar kiye is ne akele hi hazaron maidan

kisi maidan mein ab tak nahin haari urdu

ab bhi stage pe bhashan jo diya jata hai

bolte is mein bhi hain ram bihaari urdu

is ko har mulk ka insan samajh leta hai

is se har shaKHs ko hai aaj bhi pyari urdu

jo muKHalif hain ba-zahir unhen malum nahin

raat din bolti hai un ki kahaari urdu

pak har aib se hai aur bhi daman is ka

ganga jamuna ke hai pani se nikhaari urdu

kahin 'ghaalib' ki hain nazmen kahin chakbast ki hain

sheKH-o-panDit ne hai mil-jul ke sanwari urdu

aaj sannaTe mein kahti hai ye bhaarat mata

tum ko malum nahin hum ko hai pyari urdu

doston ke liye paigham-e-masarrat hai magar

dushmanon ke liye be-shak hai kaTari urdu

coat patlun pahan kar bhi na chhoDi hum ne

hum ne khaddar ki bana Dali hai sari urdu

naujawanan-e-watan se hai ye 'nawak' ka payam

marte marte bhi zaban par rahe jari urdu