na hamdam hai na koi ham-zaban hai

na hamdam hai na koī ham-zabāñ hai

dil-e-nāshād phir bhī naġhma-ḳhvāñ hai

mirī qismat meñ hī dī hai ḳhudā ne

musībat jo bhī zer-e-āsmāñ hai

chaman ke tā.iro ab ḳhair māñgo

bahut barham mizāj-e-bāġhbāñ hai

huā ruḳhsat shabāb ai ham-safīro

tabī.at meñ vo shoḳhī ab kahāñ hai

mujhe baḳhshī hai jis ne ġham kī daulat

use kyūñkar kahūñ nā-mehrbāñ hai

ghaḌī bhar hī kī lazzat hai havas meñ

mohabbat ek kaif-e-jāvedāñ hai

dil-e-nādāñ ko bahlātī rahī jo

mire ḳhvāboñ kī vo duniyā kahāñ hai

miTā.egā koī urdu ko kyūñkar

ye 'iqbāl' aur 'ġhālib' kī zabāñ hai

'bahār' ahl-e-zamāna ko ḳhushāmad

hamārī tab-e-nāzuk par girāñ hai

na hamdam hai na koi ham-zaban hai

dil-e-nashad phir bhi naghma-KHwan hai

meri qismat mein hi di hai KHuda ne

musibat jo bhi zer-e-asman hai

chaman ke tairo ab KHair mango

bahut barham mizaj-e-baghban hai

hua ruKHsat shabab ai ham-safiro

tabiat mein wo shoKHi ab kahan hai

mujhe baKHshi hai jis ne gham ki daulat

use kyunkar kahun na-mehrban hai

ghaDi bhar hi ki lazzat hai hawas mein

mohabbat ek kaif-e-jawedan hai

dil-e-nadan ko bahlati rahi jo

mere KHwabon ki wo duniya kahan hai

miTaega koi urdu ko kyunkar

ye 'iqbaal' aur 'ghaalib' ki zaban hai

'bahaar' ahl-e-zamana ko KHushamad

hamari tab-e-nazuk par giran hai