na ho azab to koi agar sawab na ho

na ho azaab to koī agar savāb na ho

sharāb piine se īmān to ḳharāb na ho

ḳhudā ko bhūle hoñ aur dil meñ iztirāb na ho

to kyā ho aise meñ nāzil agar itaab na ho

kahīñ haqīqat-e-ahvāl misl-e-ḳhvāb na ho

vo rū-ba-rū ho magar dekhne kī taab na ho

aqīdateñ bhī diloñ se nikal hī jaatī haiñ

ye aur baat ki sajdoñ se ijtināb na ho

na jaane aur abhī kyā vo gul khilā.egā

abhī se us ke savāloñ ke lā-javāb na ho

ḳhudā kare ki mire ba.ad tā-abad mujh sā

asīr-e-zā.iqa-e-lazzat-e-sharāb na ho

ye dilbarī ke taqāzoñ ke bhī munāfī hai

ki yaar sāmne ho aur be-hijāb na ho

sulūk-e-ishq meñ be-faiz haiñ vo lab jin se

husūl-e-lazza-e-shīrīnī-e-luāb na ho

girāñ hai tab.a pe kyoñ jām-o-bāda ai 'gulfām'

shabāb kaisā agar garmī-e-shabāb na ho

na ho azab to koi agar sawab na ho

sharab pine se iman to KHarab na ho

KHuda ko bhule hon aur dil mein iztirab na ho

to kya ho aise mein nazil agar itab na ho

kahin haqiqat-e-ahwal misl-e-KHwab na ho

wo ru-ba-ru ho magar dekhne ki tab na ho

aqidaten bhi dilon se nikal hi jati hain

ye aur baat ki sajdon se ijtinab na ho

na jaane aur abhi kya wo gul khilaega

abhi se us ke sawalon ke la-jawab na ho

KHuda kare ki mere baad ta-abad mujh sa

asir-e-zaiqa-e-lazzat-e-sharab na ho

ye dilbari ke taqazon ke bhi munafi hai

ki yar samne ho aur be-hijab na ho

suluk-e-ishq mein be-faiz hain wo lab jin se

husul-e-lazza-e-shirini-e-luab na ho

giran hai taba pe kyon jam-o-baada ai 'gulfam'

shabab kaisa agar garmi-e-shabab na ho