na ho jis sar mein tere ishq ka sauda wo sar kya hai

na ho jis sar meñ tere ishq kā saudā vo sar kyā hai

tire rū-e-hasīñ par jo na Thahre vo nazar kyā hai

jhukī jaatī hai kyoñ apnī jabīñ be-iḳhtiyārāna

agar ka.aba nahīñ hai phir tumhārā sang-e-dar kyā hai

idhar tashrīf laane kī kabhī zahmat to farmā.eñ

sukūnat ke liye dil merā hāzir hai ye ghar kyā hai

baġhair-e-sa.ī-e-paiham tajraba hāsil nahīñ hotā

safar jis ne kiye haiñ vo batā.egā safar kyā hai

tirā dushman agar saarā jahāñ ho jaa.e hone de

tū sachchā hai to sachchī baat kah dene meñ Dar kyā hai

nahīñ pahchān agar tujh ko 'nasīr' apne parā.e kī

to phir tū koī dānish-mand kyā hai dīda-var kyā hai

na ho jis sar mein tere ishq ka sauda wo sar kya hai

tere ru-e-hasin par jo na Thahre wo nazar kya hai

jhuki jati hai kyon apni jabin be-iKHtiyarana

agar kaba nahin hai phir tumhaara sang-e-dar kya hai

idhar tashrif lane ki kabhi zahmat to farmaen

sukunat ke liye dil mera hazir hai ye ghar kya hai

baghair-e-sai-e-paiham tajraba hasil nahin hota

safar jis ne kiye hain wo bataega safar kya hai

tera dushman agar sara jahan ho jae hone de

tu sachcha hai to sachchi baat kah dene mein Dar kya hai

nahin pahchan agar tujh ko 'nasir' apne parae ki

to phir tu koi danish-mand kya hai dida-war kya hai