na hoga shauq ye ab kam hamara

na hogā shauq ye ab kam hamārā

tire kūche meñ nikle dam hamārā

yaqīñ jo us pe ho mohkam hamārā

bigāḌegā ye kyā aalam hamārā

yahāñ tafrīq har parcham tale hai

faqat tafrīq-kush parcham hamārā

ham apnā jā.eza le kar to dekheñ

kahāñ hai aaj ye sar ḳham hamārā

na samjhe vo qusūr un kā nahīñ hai

ishāra thā hī kuchh mub.ham hamārā

yahāñ hai kaun apne ġham se ḳhālī

kaheñ ab kis se āḳhir ġham hamārā

jo aalam ahl-e-duniyā kā hai yaaro

vahī aalam hai besh-o-kam hamārā

kaheñ kyā tum se ham us se kaheñge

karegā duur vo hī ġham hamārā

rah-e-insāniyat bas ek hī hai

yahī elaan hai paiham hamārā

ilāhī sabr de rāh-e-vafā meñ

mizāj ho jaa.e na barham hamārā

vafā kā ye mirī radd-e-amal hai

kiyā qātil ne bhī mātam hamārā

inhīñ ahbāb hī ne to kiyā hai

charāġh-e-ārzū maddham hamārā

bulāo ibn-e-mariyam ko bulāo

laboñ par aa gayā hai dam hamārā

huā kyā haa.e 'āqib' be-ḳhudī meñ

huā dāman ye kaise nam hamārā

na hoga shauq ye ab kam hamara

tere kuche mein nikle dam hamara

yaqin jo us pe ho mohkam hamara

bigaDega ye kya aalam hamara

yahan tafriq har parcham tale hai

faqat tafriq-kush parcham hamara

hum apna jaeza le kar to dekhen

kahan hai aaj ye sar KHam hamara

na samjhe wo qusur un ka nahin hai

ishaara tha hi kuchh mubham hamara

yahan hai kaun apne gham se KHali

kahen ab kis se aaKHir gham hamara

jo aalam ahl-e-duniya ka hai yaro

wahi aalam hai besh-o-kam hamara

kahen kya tum se hum us se kahenge

karega dur wo hi gham hamara

rah-e-insaniyat bas ek hi hai

yahi elan hai paiham hamara

ilahi sabr de rah-e-wafa mein

mizaj ho jae na barham hamara

wafa ka ye meri radd-e-amal hai

kiya qatil ne bhi matam hamara

inhin ahbab hi ne to kiya hai

charagh-e-arzu maddham hamara

bulao ibn-e-mariyam ko bulao

labon par aa gaya hai dam hamara

hua kya hae 'aqib' be-KHudi mein

hua daman ye kaise nam hamara