na hote rind gar saqi to maiKHane kahan jate

na hote rind gar saaqī to maiḳhāne kahāñ jaate

surāhī kis ke ghar jaatī ye paimāne kahāñ jaate

pata manzil kā miltā hai to dīvānoñ se miltā hai

na hote gar ye dīvāne to farzāne kahāñ jaate

tumhāre āriz-e-tābāñ harīf-e-sham.a-e-mahfil haiñ

na aate khich ke parvāne ḳhudā jaane kahāñ jaate

mire mamnūn haiñ dasht-o-bayābāñ ek muddat se

chaman meñ gar bahal jaatā to vīrāne kahāñ jaate

tumhārī zulf ke ḳham halqa-e-zanjīr-e-zindāñ haiñ

na aate dām-e-gesū meñ to dīvāne kahāñ jaate

pata dil kā hamāre aap ko ma.alūm thā varna

nazar ke tiir le kar shauq farmāne kahāñ jaate

buḌhāpe meñ javānī kā zamāna yaad aatā hai

magar 'āzād' vo lamhāt phir laane kahāñ jaate

na hote rind gar saqi to maiKHane kahan jate

surahi kis ke ghar jati ye paimane kahan jate

pata manzil ka milta hai to diwanon se milta hai

na hote gar ye diwane to farzane kahan jate

tumhaare aariz-e-taban harif-e-shama-e-mahfil hain

na aate khich ke parwane KHuda jaane kahan jate

mere mamnun hain dasht-o-bayaban ek muddat se

chaman mein gar bahal jata to virane kahan jate

tumhaari zulf ke KHam halqa-e-zanjir-e-zindan hain

na aate dam-e-gesu mein to diwane kahan jate

pata dil ka hamare aap ko malum tha warna

nazar ke tir le kar shauq farmane kahan jate

buDhape mein jawani ka zamana yaad aata hai

magar 'azad' wo lamhat phir lane kahan jate