na jaane kaisi mohabbat ke wade raat jale

na jaane kaisī mohabbat ke va.ade raat jale

jalā jo ḳhat to sakhī mere donoñ haath jale

guzārā din jo udāsī meñ shaam kahne lagī

bahut akelī huuñ maiñ koī mere saath jale

palaT ke haal na pūchhā fareb-kāroñ ne

ye dil ke saath mire ek aur ghaat jale

gañvā ke baiThī huuñ maiñ aaj apnā sabr-o-qarār

ki saath chāñd ke merī tū saarī raat jale

maiñ us kahānī kā kirdār huuñ ki jis meñ sadā

vafā ko likhne se pahle hī merā haath jale

ḳhizāñ ke ba.ad bahāroñ kī raah dekhī to

ye haif sad ki mirī aarzū ke paat jale

hai pyaas aisī ki 'dilshād' aañsū tak haiñ piye

ki tere hijr meñ dil merā baat baat jale

na jaane kaisi mohabbat ke wade raat jale

jala jo KHat to sakhi mere donon hath jale

guzara din jo udasi mein sham kahne lagi

bahut akeli hun main koi mere sath jale

palaT ke haal na puchha fareb-karon ne

ye dil ke sath mere ek aur ghat jale

ganwa ke baiThi hun main aaj apna sabr-o-qarar

ki sath chand ke meri tu sari raat jale

main us kahani ka kirdar hun ki jis mein sada

wafa ko likhne se pahle hi mera hath jale

KHizan ke baad bahaaron ki rah dekhi to

ye haif sad ki meri aarzu ke pat jale

hai pyas aisi ki 'dilshad' aansu tak hain piye

ki tere hijr mein dil mera baat baat jale