na jaane kaun se mausam ke intizar mein hain

na jaane kaun se mausam ke intizār meñ haiñ

fasurda phuul jo kuchh dāman-e-bahār meñ haiñ

kisī kā haal nahīñ dekhtā yahāñ koī

sab apnī apnī tamannāoñ ke hisār meñ haiñ

shikasta qabroñ meñ mahsūr TūTe-phūTe jism

na jaane kab se qayāmat ke intizār meñ haiñ

ye kā.enāt aur is ke tamām lail-o-nahār

azal se kashmakash-e-jabr-o-iḳhtiyār meñ haiñ

qadam qadam pe yahāñ chīḳhne kī hai āvāz

ki jaise ham kisī maidān-e-kār-zār meñ haiñ

saroñ pe sāya-e-dīvār bhī nahīñ ab to

magar ham ab bhī bahāroñ ke intizār meñ haiñ

musāfiroñ se kaho thoḌī der ruk jaa.eñ

ki chand barg abhī shāḳh-e-sāya-dār meñ haiñ

ye apne ḳhuun ke rishte bhī bech sakte haiñ

kuchh aise log siyāsat ke kārobār meñ haiñ

mohabbatoñ kā hai jis din se silsila TuuTā

na vo sukūñ meñ haiñ 'arshad' na ham qarār meñ haiñ

na jaane kaun se mausam ke intizar mein hain

fasurda phul jo kuchh daman-e-bahaar mein hain

kisi ka haal nahin dekhta yahan koi

sab apni apni tamannaon ke hisar mein hain

shikasta qabron mein mahsur TuTe-phuTe jism

na jaane kab se qayamat ke intizar mein hain

ye kaenat aur is ke tamam lail-o-nahaar

azal se kashmakash-e-jabr-o-iKHtiyar mein hain

qadam qadam pe yahan chiKHne ki hai aawaz

ki jaise hum kisi maidan-e-kar-zar mein hain

saron pe saya-e-diwar bhi nahin ab to

magar hum ab bhi bahaaron ke intizar mein hain

musafiron se kaho thoDi der ruk jaen

ki chand barg abhi shaKH-e-saya-dar mein hain

ye apne KHun ke rishte bhi bech sakte hain

kuchh aise log siyasat ke karobar mein hain

mohabbaton ka hai jis din se silsila TuTa

na wo sukun mein hain 'arshad' na hum qarar mein hain