na jaane kya hue atraf dekhne wale

na jaane kyā hue atrāf dekhne vaale

tamām shahr ko shaffāf dekhne vaale

giraft kā koī pahlū nazar nahīñ aatā

malūl haiñ mire ausāf dekhne vaale

sivā.e raakh koī chiiz bhī na haath aa.ī

ki ham the varsa-e-aslāf dekhne vaale

hamesha band hī rakhte haiñ zāhirī āñkheñ

ye tīrgī meñ bahut saaf dekhne vaale

mohabbatoñ kā koī tajraba nahīñ rakhte

har ek saañs kā isrāf dekhne vaale

ab us ke ba.ad hī manzar hai sañg-bārī kā

sambhal ke bārish-e-altāf dekhne vaale

gañvā.e baiThe haiñ āñkhoñ kī raushnī 'shāhid'

jahāñ-panāh kā insāf dekhne vaale

na jaane kya hue atraf dekhne wale

tamam shahr ko shaffaf dekhne wale

giraft ka koi pahlu nazar nahin aata

malul hain mere ausaf dekhne wale

siwae rakh koi chiz bhi na hath aai

ki hum the warsa-e-aslaf dekhne wale

hamesha band hi rakhte hain zahiri aankhen

ye tirgi mein bahut saf dekhne wale

mohabbaton ka koi tajraba nahin rakhte

har ek sans ka israf dekhne wale

ab us ke baad hi manzar hai sang-bari ka

sambhal ke barish-e-altaf dekhne wale

ganwae baiThe hain aankhon ki raushni 'shahid'

jahan-panah ka insaf dekhne wale