na-jaane TuT ke kab se bikhar raha hun main

na-jāne TuuT ke kab se bikhar rahā huuñ maiñ

ki apnī zaat kā ḳhud ek sāneha huuñ maiñ

mire lahū kī zarūrat hai tere hāthoñ ko

isī tasavvur-e-rañgīñ se jī rahā huuñ maiñ

musībateñ to haiñ apnī shumār se bāhar

ki hādsāt meñ har lahza mubtalā huuñ maiñ

na-jāne kaisā safar hai ki kuchh pata hī nahīñ

chalā kahāñ se kahāñ aa ke ruk gayā huuñ maiñ

na yaad aa.e koī aur na de koī āvāz

nikal ke yādoñ kī bastī se aa gayā huuñ maiñ

anā ko toḌ ke aa jā.ūñ tere paas magar

tirā irāda na ab tak samajh sakā huuñ maiñ

phir aaj sahme hue lamhe yaad aane lage

hisār-e-dard meñ 'ḳhurshīd' ghir gayā huuñ maiñ

na-jaane TuT ke kab se bikhar raha hun main

ki apni zat ka KHud ek saneha hun main

mere lahu ki zarurat hai tere hathon ko

isi tasawwur-e-rangin se ji raha hun main

musibaten to hain apni shumar se bahar

ki hadsat mein har lahza mubtala hun main

na-jaane kaisa safar hai ki kuchh pata hi nahin

chala kahan se kahan aa ke ruk gaya hun main

na yaad aae koi aur na de koi aawaz

nikal ke yaadon ki basti se aa gaya hun main

ana ko toD ke aa jaun tere pas magar

tera irada na ab tak samajh saka hun main

phir aaj sahme hue lamhe yaad aane lage

hisar-e-dard mein 'KHurshid' ghir gaya hun main