na jis ka koi sahaara ho wo kidhar jae

na jis kā koī sahārā ho vo kidhar jaa.e

na aa.e maut to be-maut kaise mar jaa.e

maiñ is ḳhayāl se un se gilā nahīñ kartā

kahīñ na phuul se chehre kā rañg utar jaa.e

tū hī batā de mujhe be-kasī-e-manzil-e-shauq

jo raah se bhī na vāqif ho vo kidhar jaa.e

hazāroñ taur nahīñ chashm-e-ma.arifat ke liye

jahāñ jahāñ tirī mo.ajiz-numā nazar jaa.e

tajalliyāt se ma.amūr hai har ik zarra

bilā-sabab na koī koh-e-tūr par jaa.e

na pī tū apne ye aañsū mazāq meñ 'sāqī'

kahīñ na zahr mohabbat meñ kaam kar jaa.e

na jis ka koi sahaara ho wo kidhar jae

na aae maut to be-maut kaise mar jae

main is KHayal se un se gila nahin karta

kahin na phul se chehre ka rang utar jae

tu hi bata de mujhe be-kasi-e-manzil-e-shauq

jo rah se bhi na waqif ho wo kidhar jae

hazaron taur nahin chashm-e-marifat ke liye

jahan jahan teri moajiz-numa nazar jae

tajalliyat se mamur hai har ek zarra

bila-sabab na koi koh-e-tur par jae

na pi tu apne ye aansu mazaq mein 'saqi'

kahin na zahr mohabbat mein kaam kar jae