na jis mein aarzu hoti na jis mein muddaa hota

na jis meñ aarzū hotī na jis meñ mudda.ā hotā

mujhe bhī ek dil yā-rab koī aisā diyā hotā

shab-e-va.ada vo aatā bhī to kyā is ke sivā hotā

jo maiñ sarf-e-vafā hotā to vo garm-e-jafā hotā

shab-e-furqat agar naala mire dil kā rasā hotā

falak kyā chiiz hai arsh-e-mua.allā hil gayā hotā

dikhā detā agar maiñ dāġh-hā-e-dil kabhī un ko

mirā zimma jo phir mashq-e-sitam kā hausla hotā

diyā thā dil to detā ishq bhī apnā use yā-rab

milā thā sar to saudā bhī tirā hī yā ḳhudā hotā

ḳhatā kyā yaar kī is meñ jo qabl-az-vaqt maut aa.ī

vafā kartī jo merī umr to va.ada vafā hotā

na aatā thā unheñ kyā mujh ko miTTī meñ milā denā

magar Dar thā ki hotā ḳhaak bhī to kīmiyā hotā

adū ke dastaḳhat se ḳhat mujhe bhejā hai kāfir ne

muqaddar kā jo likkhā thā na kyūñkar vo adā hotā

tirī kotāh-bīnī ne tujhe khoyā hai ai vaa.iz

ḳhudā ko jaan jaatā gar butoñ se āshnā hotā

sar-o-tan kā chalā aatā hai jhagḌā ek muddat se

madad kartī tirī talvār to kuchh faisla hotā

tire sadqe nigāh-e-nāz kyoñ aġhmāz kartī hai

hamārī baat ban jaatī tirā nuqsān kyā hotā

kahīñ pur-lutf hai ye qissa-e-farhād-o-majnūñ se

hamāre dil kā dukhḌā bhī kabhī sāhib sunā hotā

na aa.e tum na aate bhejte tasvīr hī apnī

mire dil ko bahalne kā koī to mashġhalā hotā

ġham-e-jānāñ na detā saath merā tū bhī furqat meñ

usī kī tarah zālim kaash tū bhī bevafā hotā

mire dil se vo rah rah kar kisī kā naaz se kahnā

ajab ik chiiz tū hotā agar be-mudda.ā hotā

sunātā qissa-e-ġham tujh meñ ġham-ḳhvārī agar hotī

dikhātā dard-e-dil tujh ko jo tū dard-āshnā hotā

dil-e-vahshī na kahtā thā ki baaz aa ishq-e-gesū se

mirī suntā to kyoñ kāfir giraftār-e-balā hotā

janāb-e-ḳhizr deñge saath kyā sahrā-e-ulfat meñ

dil-e-āfat-talab tū hī hamārā rahnumā hotā

ye kyā saudā-e-hūrān-e-ḳhayālī tujh ko hai zāhid

kisī kāfir-adā par to fidā mard-e-ḳhudā hotā

baḌe nāz-o-ni.am se ham ne ai dil tujh ko paalā thā

ḳhudā.ī ham se phir jaatī na lekin tū judā hotā

khiñche jaate the vo ḳhanjar kī sūrat vasl meñ 'nashtar'

nikaltī ḳhaak hasrat ḳhaak puurā hausla hotā

na jis mein aarzu hoti na jis mein muddaa hota

mujhe bhi ek dil ya-rab koi aisa diya hota

shab-e-wada wo aata bhi to kya is ke siwa hota

jo main sarf-e-wafa hota to wo garm-e-jafa hota

shab-e-furqat agar nala mere dil ka rasa hota

falak kya chiz hai arsh-e-mualla hil gaya hota

dikha deta agar main dagh-ha-e-dil kabhi un ko

mera zimma jo phir mashq-e-sitam ka hausla hota

diya tha dil to deta ishq bhi apna use ya-rab

mila tha sar to sauda bhi tera hi ya KHuda hota

KHata kya yar ki is mein jo qabl-az-waqt maut aai

wafa karti jo meri umr to wada wafa hota

na aata tha unhen kya mujh ko miTTi mein mila dena

magar Dar tha ki hota KHak bhi to kimiya hota

adu ke dastaKHat se KHat mujhe bheja hai kafir ne

muqaddar ka jo likkha tha na kyunkar wo ada hota

teri kotah-bini ne tujhe khoya hai ai waiz

KHuda ko jaan jata gar buton se aashna hota

sar-o-tan ka chala aata hai jhagDa ek muddat se

madad karti teri talwar to kuchh faisla hota

tere sadqe nigah-e-naz kyon aghmaz karti hai

hamari baat ban jati tera nuqsan kya hota

kahin pur-lutf hai ye qissa-e-farhad-o-majnun se

hamare dil ka dukhDa bhi kabhi sahib suna hota

na aae tum na aate bhejte taswir hi apni

mere dil ko bahalne ka koi to mashghala hota

gham-e-jaanan na deta sath mera tu bhi furqat mein

usi ki tarah zalim kash tu bhi bewafa hota

mere dil se wo rah rah kar kisi ka naz se kahna

ajab ek chiz tu hota agar be-muddaa hota

sunata qissa-e-gham tujh mein gham-KHwari agar hoti

dikhata dard-e-dil tujh ko jo tu dard-ashna hota

dil-e-wahshi na kahta tha ki baz aa ishq-e-gesu se

meri sunta to kyon kafir giraftar-e-bala hota

janab-e-KHizr denge sath kya sahra-e-ulfat mein

dil-e-afat-talab tu hi hamara rahnuma hota

ye kya sauda-e-huran-e-KHayali tujh ko hai zahid

kisi kafir-ada par to fida mard-e-KHuda hota

baDe naz-o-niam se hum ne ai dil tujh ko pala tha

KHudai hum se phir jati na lekin tu juda hota

khinche jate the wo KHanjar ki surat wasl mein 'nashtar'

nikalti KHak hasrat KHak pura hausla hota