na kaam aai mere kuchh meri sharafat bhi

na kaam aa.ī mire kuchh mirī sharāfat bhī

mire ḳhilāf huī us ke saath ḳhilqat bhī

vo shaḳhs yuuñ thā ki jaise dhulā-dhulāyā huā

thī ḳhatm us pe har ik tarah kī nafāsat bhī

vo jāma-zeb thā itnā ki takte hī rahiye

ye dil to chāhtā thā mustaqil rafāqat bhī

bilā-sabab na thā us meñ vafūr-e-ḳhud-bīnī

ġhurūr-e-husn ke ham-rāh thī nazākat bhī

thā us kā chehra-e-zebā ki māh-pāra koī

sukūn-baḳhsh thī us kī mujhe tamāzat bhī

barat na saktā thā khul kar vo iltifāt magar

thī us kī chashm-e-fusūñ-sāz meñ muravvat bhī

maiñ us ke sāmne gum-sum rahā suḳhan-basta

na kar sakā kabhī arz-e-hunar kī jur.at bhī

maiñ kār-gāh-e-jahāñ meñ azal se huuñ tanhā

na raas aa.ī mujhe mahvashoñ kī qurbat bhī

hujūm-e-shauq meñ yuuñ bhī huā ki maiñ 'nāsir'

havās gum kiye bhūle rahā zehānat bhī

na kaam aai mere kuchh meri sharafat bhi

mere KHilaf hui us ke sath KHilqat bhi

wo shaKHs yun tha ki jaise dhula-dhulaya hua

thi KHatm us pe har ek tarah ki nafasat bhi

wo jama-zeb tha itna ki takte hi rahiye

ye dil to chahta tha mustaqil rafaqat bhi

bila-sabab na tha us mein wafur-e-KHud-bini

ghurur-e-husn ke ham-rah thi nazakat bhi

tha us ka chehra-e-zeba ki mah-para koi

sukun-baKHsh thi us ki mujhe tamazat bhi

barat na sakta tha khul kar wo iltifat magar

thi us ki chashm-e-fusun-saz mein murawwat bhi

main us ke samne gum-sum raha suKHan-basta

na kar saka kabhi arz-e-hunar ki jurat bhi

main kar-gah-e-jahan mein azal se hun tanha

na ras aai mujhe mahwashon ki qurbat bhi

hujum-e-shauq mein yun bhi hua ki main 'nasir'

hawas gum kiye bhule raha zehanat bhi