na karwan ka hamare koi nishan raha

na kārvāñ kā hamāre koī nishān rahā

na ham-safar na hī kashtī na bādbān rahā

zamīn apnī taraf khīñchtī rahī mujh ko

savār sar pe sadā mere āsmān rahā

mujhe ḳhabar thī gayā thā tū ġhair se milne

maiñ jān-būjh ke mahfil meñ be-zabān rahā

tamām umr musallat rahā vo dil pe mire

tamām umr maiñ zālim kā mezbān rahā

huā na qaid-e-zamān-o-makāñ se maiñ āzād

zamīñ se duur magar zer-e-āsmān rahā

sharīk vo bhī thā mere ḳhilāf sāzish meñ

ki jis ke saath sadā merā khān-pān rahā

na dil meñ jaltī huī aag bujh sakī 'ābid'

na sar pe mere kabhī koī sā.ebān rahā

na karwan ka hamare koi nishan raha

na ham-safar na hi kashti na baadban raha

zamin apni taraf khinchti rahi mujh ko

sawar sar pe sada mere aasman raha

mujhe KHabar thi gaya tha tu ghair se milne

main jaan-bujh ke mahfil mein be-zaban raha

tamam umr musallat raha wo dil pe mere

tamam umr main zalim ka mezban raha

hua na qaid-e-zaman-o-makan se main aazad

zamin se dur magar zer-e-asman raha

sharik wo bhi tha mere KHilaf sazish mein

ki jis ke sath sada mera khan-pan raha

na dil mein jalti hui aag bujh saki 'abid'

na sar pe mere kabhi koi saeban raha