na kamal hun na jamal hun tujhe ilm ho ki na ilm ho

na kamāl huuñ na jamāl huuñ tujhe 'ilm ho ki na 'ilm ho

tirī mahviyat kā ma.aal huuñ tujhe 'ilm ho ki na 'ilm ho

tujhe kyoñ malāl-e-'urūj hai mirī azmatoñ se hai ḳhauf kyā

tirā 'aks-e-māzī-o-hāl huuñ tujhe 'ilm ho ki na 'ilm ho

sitam-āshnā rahā 'umr-bhar jo qalam kī zad meñ na aa sakā

vo javāb-e-daur-e-zavāl huuñ tujhe 'ilm ho ki na 'ilm ho

mire dam se haiñ tirī shohrateñ tirā husn mujh se hai jalva-gar

maiñ razā-e-rabb-e-jalāl huuñ tujhe 'ilm ho ki na 'ilm ho

tirā lutf shāhid-e-lam-yazal tirī zaat vaj.h-e-sukūn-e-dil

maiñ asīr-e-lutf-e-jamāl huuñ tujhe 'ilm ho ki na 'ilm ho

tū savād-e-ġham na samajh ise ki vaqār terā isī se hai

ruḳh-e-gul pe dāna-e-ḳhāl huuñ tujhe 'ilm ho ki na 'ilm ho

jo shikār-e-daur-e-ḳhizāñ rahī jise baḳht bhī na uThā sakā

vo burīda shāḳh-e-nihāl huuñ tujhe 'ilm ho ki na 'ilm ho

'alavī' shu'ūr kī daad de tū na pā sakā mirī gard bhī

maiñ sarāpā husn-e-ḳhayāl huuñ tujhe 'ilm ho ki na 'ilm ho

na kamal hun na jamal hun tujhe 'ilm ho ki na 'ilm ho

teri mahwiyat ka maal hun tujhe 'ilm ho ki na 'ilm ho

tujhe kyon malal-e-'uruj hai meri azmaton se hai KHauf kya

tera 'aks-e-mazi-o-haal hun tujhe 'ilm ho ki na 'ilm ho

sitam-ashna raha 'umr-bhar jo qalam ki zad mein na aa saka

wo jawab-e-daur-e-zawal hun tujhe 'ilm ho ki na 'ilm ho

mere dam se hain teri shohraten tera husn mujh se hai jalwa-gar

main raza-e-rabb-e-jalal hun tujhe 'ilm ho ki na 'ilm ho

tera lutf shahid-e-lam-yazal teri zat wajh-e-sukun-e-dil

main asir-e-lutf-e-jamal hun tujhe 'ilm ho ki na 'ilm ho

tu sawad-e-gham na samajh ise ki waqar tera isi se hai

ruKH-e-gul pe dana-e-KHal hun tujhe 'ilm ho ki na 'ilm ho

jo shikar-e-daur-e-KHizan rahi jise baKHt bhi na uTha saka

wo burida shaKH-e-nihaal hun tujhe 'ilm ho ki na 'ilm ho

'alawi' shu'ur ki dad de tu na pa saka meri gard bhi

main sarapa husn-e-KHayal hun tujhe 'ilm ho ki na 'ilm ho