na kar dil-jui ai sayyaad meri

na kar dil-jūī ai sayyād merī

ki fitrat hai bahut āzād merī

asīrī se rihā.ī paane vaalo

tumheñ pahuñche mubārakbād merī

sahārā kyuuñ liyā thā nāḳhudā kā

ḳhudā bhī kyuuñ kare imdād merī

bhulā do mujh ko lekin yaad rakhnā

satā.egī tumheñ bhī yaad merī

farishte kyā murattab kar sakeñge

bahut be-rabt hai rūdād merī

pasand aane lagī thī sar-bulandī

yahī thī avvalīñ uftād merī

kiyā pāband-e-nai naale ko maiñ ne

ye tarz-e-ḳhās hai ījād merī

mire ash.ār par chup rahne vaale

tire hisse meñ aa.ī daad merī

qazā kā zulm had se baḌh gayā hai

koī suntā nahīñ fariyād merī

ḳhudāvandā qazā ne chhīn lī hai

mire āġhosh se 'irshād' merī

na kar dil-jui ai sayyaad meri

ki fitrat hai bahut aazad meri

asiri se rihai pane walo

tumhein pahunche mubarakbaad meri

sahaara kyun liya tha naKHuda ka

KHuda bhi kyun kare imdad meri

bhula do mujh ko lekin yaad rakhna

sataegi tumhein bhi yaad meri

farishte kya murattab kar sakenge

bahut be-rabt hai rudad meri

pasand aane lagi thi sar-bulandi

yahi thi awwalin uftad meri

kiya paband-e-nai nale ko main ne

ye tarz-e-KHas hai ijad meri

mere ashaar par chup rahne wale

tere hisse mein aai dad meri

qaza ka zulm had se baDh gaya hai

koi sunta nahin fariyaad meri

KHudawanda qaza ne chhin li hai

mere aaghosh se 'irshad' meri