na kar kisi ki mohabbat ka eatibar na kar

na kar kisī kī mohabbat kā e.atibār na kar

tamām umr tamanna ko sogvār na kar

ḳhulūs-e-dil hai baḌī chiiz zindagī ke liye

zarā se ġham meñ garebāñ ko taar taar na kar

jabīn-e-shauq ko pāmāl kar na yaas ke naam

yuuñ zulm apnī javānī pe be-shumār na kar

unheñ to shaam Dhale niiñd aa ga.ī hogī

sahar ke vaqt sitāroñ kā intizār na kar

kahā thā us ne tumheñ pyaar ham bhī karte haiñ

to us kī bātoñ kā aise to e.atibār na kar

ye jaan kar bhī ki london pe 'raaj hai us kā

tū merī maan le us par yuuñ iḳhtiyār na kar

na kar kisi ki mohabbat ka eatibar na kar

tamam umr tamanna ko sogwar na kar

KHulus-e-dil hai baDi chiz zindagi ke liye

zara se gham mein gareban ko tar tar na kar

jabin-e-shauq ko pamal kar na yas ke nam

yun zulm apni jawani pe be-shumar na kar

unhen to sham Dhale nind aa gai hogi

sahar ke waqt sitaron ka intizar na kar

kaha tha us ne tumhein pyar hum bhi karte hain

to us ki baaton ka aise to eatibar na kar

ye jaan kar bhi ki london pe 'raj hai us ka

tu meri man le us par yun iKHtiyar na kar